काठमाडौँ: हाल देशको पश्चिमी र मध्य भू–भागमा पश्चिमी वायु तथा स्थानीय वायुको प्रभाव देखिएको छ भने कोशी प्रदेशका अधिकांश भू–भागमा मनसुनी वायुको प्रभाव सक्रिय रहेको मौसम पूर्वानुमान महाशाखाले जनाएको छ।
महाशाखाका अनुसार,आज दिउँसो देशको कोशी प्रदेशसहित पहाडी भू–भागहरूमा आंशिकदेखि सामान्य बदलीको अवस्था रहनेछ, भने अन्य क्षेत्रहरूमा मुख्यतया सफा वा आंशिक बदली रहने अनुमान गरिएको छ।
कोशी प्रदेशका थोरै स्थानहरू तथा अन्य प्रदेशका पहाडी भू–भागका एक–दुई स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। साथै, कोशी, बागमती र गण्डकी प्रदेशका उच्च पहाडी तथा हिमाली भू–भागमा हल्का वर्षा र हिमपात पनि हुन सक्ने महाशाखाले जनाएको छ।
आज राति पनि कोशी प्रदेशसहित देशका पहाडी भू–भागमा आंशिक बदली रहनेछ भने अन्य स्थानहरूमा मौसम मुख्यतया सफा रहनेछ।
कोशी र गण्डकी प्रदेशका पहाडी भागहरूमा एक–दुई स्थानमा मेघगर्जन र चट्याङसहित हल्कादेखि मध्यम वर्षा तथा उच्च पहाडी र हिमाली क्षेत्रहरूमा हल्का वर्षा र हिमपातको सम्भावना रहेको जनाइएको छ।
