मकवानपुर: हेटौँडा उपमहानगरपालिका–१६ र १७ को सिमानामा पर्ने गैरी गाउँस्थित सडकमा गत वैशाख १९ गते भासिएको बलेरो जिपको अध्ययनका लागि खटिएको भूगर्भविद् टोली काठमाडौं फर्किएको छ।
टोली प्रमुख नारायण अधिकारीका अनुसार घटनास्थल वरिपरि जमिनको अवस्था झन् कमजोर बन्दै गएकाले खोज तथा अनुसन्धानमा अवरोध भएको हो। टोलीले स्थल आसपास बोरिङ गरी सङ्कलन गरिएको पानीको नमुना ल्याब परीक्षणका लागि काठमाडौं पठाएको छ। परीक्षणको रिपोर्ट आएपछि दोस्रो चरणको खोज तथा अनुसन्धान तीव्र रूपमा अघि बढाइने अधिकारीले जानकारी दिनुभयो।
जिल्ला प्रहरी कार्यालय मकवानपुरका प्रवक्ता तथा प्रहरी नायब उपरीक्षक श्यामुल अर्यालका अनुसार हालसम्म जिपको अत्तोपत्तो लागेको छैन। घटनास्थल वरिपरि जोखिम कायमै रहेकाले थप क्षति हुन नदिन सुरक्षा घेरा कायम गरिएको उहाँले बताउनुभयो।
