हेटौँडा: हेटौँडाको गैरी गाउँमा शुक्रबार अपराह्न सडक भासिँदा माछा बोक्दै गरेको बोलेरो गाडी जमिनमुनि बेपत्ता भएको छ। हेटौँडा उपमहानगरपालिका–१६ र १७ को सिमानामा पर्ने क्षेत्रमा ना ४ च ४८३३ नम्बरको सिङ्गल क्याप बोलेरो गाडी भासिएको मकवानपुर प्रहरीका प्रवक्ता डिएसपी श्यामु अर्यालले जानकारी दिए।
प्रवक्ता अर्यालका अनुसार गाडी रोकिने स्थानमै एक्कासि जमिन भासिँदा उक्त घटना भएको हो। गाडी भासिँदै जाँदा त्यस ठाउँमा पानीको ठूलो दह बनेको र गाडी भासिएको झन्डै ५ सेकेन्डमै हराएको प्रत्यक्षदर्शीहरूले बताएका छन्।
सौभाग्यवश, चालक र सहचालक भने गाडी भासिनुअघि नै बाहिर निस्कन सफल भएका थिए।
घटनास्थल नजिकै माछापालनको पोखरी र बोरिङ रहेको पाइएको छ। प्रारम्भिक अनुमानअनुसार बोरिङका कारण जमिन कमजोर भई भासिएको हुनसक्ने बताइएको छ। हाल पानीको निकास गरी गाडीको खोजी कार्य जारी रहेको प्रहरीले जनाएको छ।
