वीरगञ्ज (पर्सा): हनुमान जन्मोत्सवको अवसरमा शनिबार दुई समुदायबीच भएको झडपका क्रममा नेपाल प्रहरी र सशस्त्र प्रहरी बलका दर्जनौं सुरक्षाकर्मी घाइते भएका छन्। ढुंगा हानाहानमा परी पर्साका प्रहरी प्रमुख गौतम मिश्रसहित १७ जना नेपाल प्रहरी र सशस्त्र प्रहरी बल नेपालका प्रहरी नायब उपरीक्षक (डीएसपी) देवेन्द्रबहादुर सिंहसहित आठ जना सशस्त्र प्रहरी घाइते भएका हुन्।
प्रहरी प्रमुख मिश्रले आफू दाहिने हातमा चोट लागेपनि अन्य प्रहरीहरू गम्भीर रूपमा घाइते भएको जानकारी दिनुभयो। वडा प्रहरी कार्यालय बिर्ताका प्रहरी निरीक्षक निरोज चौलागाईंसमेत घाइते भएका छन्।
मिश्रका अनुसार झडपमा परी सर्वसाधारणतर्फ १२ जना घाइते भएका छन्। नारायणी अस्पताल वीरगञ्जका प्रवक्ता डा. उदयनारायण सिंहका अनुसार शनिबारको घटनापछि नेपाल प्रहरी, सशस्त्र प्रहरी र सर्वसाधारण गरी ४३ जनाको अस्पतालमा उपचार भइरहेको छ। “कतिपय सामान्य उपचारपछि घर फर्किसक्नुभएको छ भने केहीको अझै उपचार चलिरहेको छ,” उहाँले जानकारी दिनुभयो।
डा. सिंहका अनुसार अधिकांश घाइतेहरू टाउको र छातीमा ढुंगा वा इँटाले लागेका छन्। सूर्या हस्पिटल प्रालिका प्रमुख सरोज सिंहले प्रहरी नायब उपरीक्षक सिंहसहित केही घाइतेको आफ्नो अस्पतालमा उपचार गरिएको जानकारी दिनुभयो। “एकजनाको खुट्टा भाँचिएको छ, उपचार भइरहेको छ,” उहाँले बताउनुभयो, “अरू सामान्य घाइतेहरू डिस्चार्ज भइसकेका छन्।”
स्थिति नियन्त्रणमा राख्न जिल्ला प्रशासन कार्यालय पर्साले शनिबार बेलुकादेखि आइतबार बिहान १२:०० बजेसम्मका लागि कर्फ्यु आदेश जारी गरेको छ।
