वासिङ्टन डिसी: स्वास्थ्य तथा जनसङ्ख्यामन्त्री प्रदिप पौडेल राष्ट्रसंघीय जनसङ्ख्या तथा विकास आयोग (UN Commission on Population and Development) को ५८औं सभामा सहभागी हुन आइतबार न्यूयोर्क पुगेका छन्।
न्यूयोर्क आगमनमा मन्त्री पौडेललाई संयुक्त राष्ट्रसंघका लागि नेपाल सरकारका स्थायी प्रतिनिधि लोकबहादुर थापासहित दूतावासका अधिकारीहरूले स्वागत गरेका थिए। स्वागत टोलीमा जनसम्पर्क समिति अमेरिका अध्यक्ष आनन्द विष्ट र महासचिव मुनेन्द्र नेमवाङ पनि उपस्थित थिए।
संयुक्त राष्ट्रसंघका लागि स्थायी नियोगका अनुसार मन्त्री पौडेलले सोमबार र मंगलबार हुने उच्चस्तरीय बैठकहरूमा नेपालको प्रतिनिधित्व गर्दै सहभागिता जनाउने कार्यक्रम रहेको छ।
