काठमाडौं । प्रतिनिधि सभा निर्वाचनमा स्पष्ट बहुमत प्राप्त गर्ने निश्चित भएको राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन) प्रधानमन्त्री नियुक्त भएपछि विश्वासको मत लिनु नपर्ने भएको छ।
निर्वाचनअघि नै रास्वपाले बालेनलाई प्रधानमन्त्रीको उम्मेदवार घोषणा गर्दै मत मागेकाले पार्टीले उनलाई नै प्रधानमन्त्रीका रूपमा अघि सार्ने विश्वास गरिएको छ।
संविधानको धारा ७६ को उपधारा (१) अनुसार कुनै पनि दलले प्रतिनिधिसभामा स्पष्ट बहुमत प्राप्त गरेमा सो दलको संसदीय दलको नेता प्रधानमन्त्री नियुक्त हुने व्यवस्था छ। यस्तो अवस्थामा प्रधानमन्त्रीले संसदबाट विश्वासको मत लिनुपर्ने प्रावधान छैन।
तर दुई वा दुईभन्दा बढी दलको गठबन्धनबाट सरकार बनेको अवस्थामा वा कुनै दलले एकल बहुमत नल्याई ठूलो दलको हैसियतमा सरकार गठन गरेको अवस्थामा भने प्रधानमन्त्रीले संसदबाट अनिवार्य रूपमा विश्वासको मत लिनुपर्ने व्यवस्था रहेको छ।
