काठमाडाैं: रुपन्देहीको बुटवलस्थित सुप्रिम सहकारी ठगी प्रकरणमा राष्ट्रिय स्वतन्त्र पार्टीका सभापति रवि लामिछानेसहित २२ जनाविरुद्ध पूरकअभियोग दर्ता गरिएको छ।
पूरकअभियोगमा ५५ करोड रुपैयाँ बिगो कायम गरिएको छ। यसअघि गत वैशाखमा गितेन्द्रबाबु (जीबी) राईसहित २८ जनाविरुद्ध सहकारी ठगीको मुद्दा दर्ता गरिएको थियो। हालसम्म यो प्रकरणमा प्रतिवादीहरूको संख्या ४२ पुगेको छ।
रवि लामिछानेविरुद्ध मात्रै व्यक्तिगत २ करोड र सामूहिक २ करोड गरी ४ करोड रुपैयाँभन्दा बढीको बिगो मागदाबी गरिएको छ। पूरकअभियोगसँगै लामिछानेको नाममा २ करोड रुपैयाँ गएको भौचरसमेत बरामद भएको छ। उक्त ऋण २०७७ चैत १८ मा स्वीकृत भएको थियो। सेवा शुल्क कटाएर १ करोड ९६ लाख रुपैयाँ गोर्खा मिडिया नेटवर्कको ग्लोबल आईएमई बैंक खाता मार्फत जम्मा भएको खुलेको छ।
लामिछाने यसअघि पोखराको सूर्यदर्शन सहकारी ठगी प्रकरणमा ६५ लाख र काठमाडौंको स्वर्णलक्ष्मी सहकारी ठगी प्रकरणमा ६० लाख धरौटी बुझाएर रिहा भएका थिए।
