काठमाडौँ: पश्चिम नेपालबाट सुरु भएको मौसम बदली विस्तारै मुलुकभर फैलिने क्रममा छ। जल तथा मौसम विज्ञान विभाग, मौसम पूर्वानुमान महाशाखाका अनुसार सोमबार साँझदेखि सुदूरपश्चिम प्रदेशमा सुरु भएको बदली क्रमशः अन्य प्रदेशमा फैलिँदैछ।
महाशाखाका मौसमविद् रोजन लामिछानेका अनुसार बदली आज राति कर्णाली प्रदेशसम्म फैलिनेछ भने विस्तारै गण्डकी र लुम्बिनी प्रदेशसम्म प्रभाव पार्नेछ। प्रणाली माथि सर्दै जाँदा केही कमजोर भए पनि प्रभाव स्पष्ट हुने उहाँले बताउनुभयो।
बुधबारदेखि प्रणाली कमजोर हुँदै जान सक्ने भए पनि आज दिउँसोसम्म बदली जारी रहने जानकारी उहाँले दिनुभयो। हालसम्म वर्षा नभए पनि राति र बिहान उच्च पहाडी तथा हिमाली क्षेत्रमा हिमपात र केही क्षेत्रमा हल्ला वर्षा हुनसक्ने सम्भावना रहेको छ।
पश्चिमी वायु र न्यूनचापीय प्रणालीको प्रभाव
महाशाखाले सोमबार साँझ सार्वजनिक गरेको विवरणअनुसार हाल देशमा पश्चिमी वायुको प्रभाव छ। सुदूरपश्चिम, कर्णाली, लुम्बिनी र गण्डकी प्रदेशमा पश्चिमी न्यूनचापीय प्रणालीको असर देखिएको छ।
हाल सुदूरपश्चिम प्रदेशमा साधारण बदली, कोशी, गण्डकी र कर्णाली प्रदेशका पहाडी क्षेत्रमा आंशिक बदली तथा अन्य भू–भागमा मौसम मुख्यतया सफा रहेको छ। बागमती र मधेस प्रदेशका केही स्थान तथा कोशी प्रदेशका एक–दुई स्थानमा आगामी २४ घण्टामा हल्का वर्षाको सम्भावना पनि रहेको महाशाखाले जनाएको छ।
चिसोको प्रभाव फेरि बढ्दै
मौसममा बदली भएसँगै नेपालमा पुनः चिसो बढ्न थालेको छ। गत मङ्सिर अन्तिम सातामा अत्यधिक चिसो बढेपछि क्रमशः घटेको तापक्रम सोमबारदेखि फेरि बढ्न थालेको हो।
विभागका अनुसार काठमाडौँको न्यूनतम तापक्रम हाल चार दशमलव तीन डिग्रीमा पुगेको छ, जुन पुस ४ गते चार दशमलव आठ डिग्री थियो। यस्तै, जुम्लामा सोमबार न्यूनतम तापक्रम माइनस सात दशमलव आठ डिग्री पुगेको छ, जुन पुस ४ गते माइनस सात दशमलव दुई डिग्री थियो। अन्य क्षेत्रका न्यूनतम तापक्रम पनि घट्दो क्रममा रहेको महाशाखाले जनाएको छ।
