काठमाडौं । गृहमन्त्री सुधन गुरुङले मधेश र लुम्बिनी प्रदेशबाट प्रतिनिधिसभा सदस्यहरूसँग सीमापार तस्करी नियन्त्रणसम्बन्धी विषयमा छलफल गरेका छन्। शुक्रबार गृह मन्त्रालयमा भएको छलफलमा सीमा क्षेत्रमा हुने तस्करीलाई प्रभावकारी रूपमा नियन्त्रण गर्नुपर्नेमा सांसदहरूले जोड दिएका छन्।
सांसदहरूले भन्सार प्रणालीमा सुधार, भन्सार दर पुनरावलोकन, सीमामा कडा निगरानी, कृषि सामग्री तथा मलखादको भन्सार प्रक्रिया सरलीकरण, साथै सीमा क्षेत्रका बासिन्दालाई दैनिक उपभोग्य वस्तु आयातमा निश्चित सीमा भित्र भन्सार छुट दिन मापदण्ड निर्धारण गर्न सुझाव दिएका छन्।
छलफलका क्रममा उठेका गृह मन्त्रालयसँग सम्बन्धित विषयहरू कार्यान्वयनतर्फ अघि बढाइने र अर्थ मन्त्रालयसँग सम्बन्धित मुद्दामा आवश्यक समन्वय र थप छलफल गरी समाधान खोजिने बताइएको छ।
