काठमाडौँ: सगरमाथा आरोही र फोटो पत्रकार पूर्णिमा श्रेष्ठले विश्वप्रसिद्ध समाचार संस्था सिएनएनको ‘द एक्स्ट्रिम एथलेट्स हु पुस्ट लिमिट इन २०२४’ सूचीमा स्थान बनाउँदै आफ्नो अद्वितीय सफलता थप्नुभएको छ।
सिएनएनको साहसी खेलाडीहरूको सूचीमा परेकामा गौरवान्वित महसुस गर्दै उहाँले सामाजिक सञ्जालमार्फत खुसी साझा गर्नुभयो। “सन् २०२४ मेरो जीवनको ऐतिहासिक वर्ष बन्यो। एउटै आरोहण याममा तीनपटक सगरमाथा आरोहण गर्ने संसारकै पहिलो महिला बन्न सफल भएँ,” उहाँले आफ्नो भावनालाई शब्दमा व्यक्त गर्नुभयो।
परिवार, साथीभाई र समर्थकहरूप्रति कृतज्ञता व्यक्त गर्दै श्रेष्ठले आगामी सन् २०२५ को यात्रालाई अझ नयाँ उचाइ र साहसिक उपलब्धिहरूको वर्ष बनोस् भन्ने शुभकामना व्यक्त गर्नुभयो।
यो वर्षको वसन्त ऋतुमा पूर्णिमा श्रेष्ठले मे १२, १९ र २५ तारिखमा लगातार तीनपटक सगरमाथाको सफल आरोहण गरी एकै याममा यस्तो उपलब्धि हासिल गर्ने पहिलो महिला बन्ने कीर्तिमान राख्नुभयो। उहाँ धौलागिरि हिमाल आरोहण गर्ने पहिलो नेपाली महिला पनि हुनुहुन्छ।
