सान फ्रान्सिस्को, क्यालिफोर्निया: सान फ्रान्सिस्कोमा नेपाली कन्सुलेट जनरलको कार्यालय स्थापनाको प्रक्रिया निर्णायक चरणमा पुगेको छ। हालै सान फ्रान्सिस्को आइपुगेका कन्सुलर जनरल लक्ष्मण खनालको सक्रियतामा कार्यालय स्थापनाका लागि उपयुक्त स्थानको छनोट प्रक्रिया तीव्र गतिमा अघि बढिरहेको छ।
खनालले स्थानीय सरकारी निकायका प्रतिनिधि, समन्वयकर्ताहरू तथा नेपाली समुदायका अगुवासँग औपचारिक तथा अनौपचारिक छलफल गर्दै सम्भावित स्थानहरूको स्थलगत निरीक्षण गर्नुभएको छ। उहाँको नेतृत्वमा अगाडि बढिरहेको प्रक्रिया चाँडै निष्कर्षमा पुग्ने अपेक्षा गरिएको छ।
कन्सुलर जनरल खनालले सान फ्रान्सिस्को क्षेत्रमा बसोबास गर्ने नेपाली नागरिकहरूसँग भेटघाट गर्दै कन्सुलेटको आवश्यकता, औचित्य र यसले ल्याउने लाभबारे जानकारी दिनुभएको छ। समुदायको सक्रिय सहभागिता, सुझाव र समर्थनले यो प्रक्रिया अझ प्रभावकारी बन्ने उहाँको विश्वास छ।
नयाँ कन्सुलेट स्थापनापछि राहदानी, नागरिकता प्रमाणिकरण, कागजात प्रमाणीकरणजस्ता कन्सुलर सेवाहरू नेपाली नागरिकका लागि सहज रूपमा उपलब्ध हुनेछन्। साथै, यसले अमेरिका–नेपाल सम्बन्धमा थप ऊर्जा भर्ने विश्वास व्यक्त गरिएको छ।
पश्चिमी अमेरिकामा नेपाली कूटनीतिक उपस्थिति विस्तार गर्ने यो कदम ऐतिहासिक हुने विश्लेषकहरूको भनाइ छ। कन्सुलेट कार्यालयले आप्रवासी नेपाली समुदायको हितमा दीर्घकालीन रूपमा काम गर्ने अपेक्षा गरिएको छ।
