पश्चिम नवलपरासीको रामग्राम नगरपालिका-२ स्थित सहरी विकास तथा भवन निर्माण विभाग चितवनले करिब सात करोड रुपैयाँ खर्चेर निर्माण गरेको भवन अहिले प्रयोगविहीन अवस्थामा छ।
रामग्राम नगरपालिकाको झरही खोला नजिकै रहेको हाटबजार क्षेत्रमा निर्माण गरिएको यो भवन भाडामा दिन नसकिएको स्थानीयहरूले बताएका छन्। रामग्राम निवासी गिरजाशंकर रौनियारका अनुसार, आफूले सटर भाडामा लिन ८० हजार रुपैयाँ जम्मा गरे पनि नगरपालिकाले भाडामा नदिएपछि रकम फिर्ता लिनुपर्यो।
“मैले नगरपालिकामा निवेदन दिएर सटर भाडामा मागेँ,” रौनियारले भने, “तर, नगरपालिकाले कुनै निर्णय गरेन। नगरप्रमुखसँग आग्रह गरे पनि सटर भाडामा दिइएन, त्यसैले एक महिनापछि आफूले जम्मा गरेको रकम फिर्ता लिन बाध्य भएँ।”
चितवनबाट सञ्चालित निर्माण कम्पनीले चार वर्षअघि नै हाटबजार भवनको भौतिक पूर्वाधार निर्माण सम्पन्न गरेको थियो। तर, भाडामा नदिँदा भवन प्रयोगविहीन बनेको स्थानीयहरूको गुनासो छ। वर्षात र चर्को घामबाट व्यापारीलाई सुरक्षित राख्न तथा बजारलाई व्यवस्थित गर्न यो भवन निर्माण गरिएको भए पनि हालसम्म यसको उपयोग हुन सकेको छैन।
सहरी विकास तथा भवन निर्माण विभागका सव-इन्जिनियर वीरेन्द्र मण्डलका अनुसार भवन निर्माणमा करिब सात करोड रुपैयाँ खर्च भएको छ, जसमा एक सयभन्दा बढी सटरहरू छन्। तर, बलक, शौचालय, सेनेटरी तथा वाइरिङका केही कामहरू बाँकी रहेकाले भवन हाल प्रयोगमा आउन सकेको छैन।
नगर प्रमुख धनपत यादवले रामग्राम नगरपालिकाले भवन भाडामा दिन चार पटक सूचना प्रकाश गरेको तर अहिलेसम्म भाडामा लिने इच्छुक व्यक्तिले सम्पर्क नगरेको जानकारी दिए।
