काठमाडौं: जसपा नेपालका अध्यक्ष उपेन्द्र यादवले सांसद खरिदबिक्री गरेर भूमिसम्बन्धी अध्यादेश पारित गर्न खोजिए कडा आन्दोलन गर्ने चेतावनी दिएका छन्।
शुक्रबार काठमाडौंमा वौद्धिक पेशाकर्मी महासंघद्वारा आयोजित अन्तक्रियामा बोल्दै उनले उक्त अध्यादेशलाई देशको हितविपरीत रहेको बताएका हुन्। साथै, सांसद खरिदबिक्रीमार्फत पारित गर्ने प्रयास भए सशक्त विरोध गर्ने चेतावनी दिएका छन्।
यादवले भूमि अध्यादेश फिर्ता लिन सरकारसँग माग गर्दै बिचौलियाहरूको संलग्नतामा अर्बौँको चलखेल भइरहेको सुनेको दाबी गरे। वन विनाश गरी देशलाई मरुभूमिकरण गर्ने कानुन अस्वीकार्य रहेको उल्लेख गर्दै उनले अध्यादेशले वास्तविक भूमिहीनहरूको समस्या समाधान गर्न नसक्ने जिकिर गरे।
उनको आरोप छ कि भूमि आयोगको उद्देश्य भूमिहीनको समस्या समाधान गर्नु होइन, बरु भू–माफियामार्फत अनुचित लाभ उठाउने षड्यन्त्र रहेको छ।
त्यस्तै, उनले सरकार गरिबी समस्या समाधान गर्नुभन्दा बिचौलियासँग मिलेर पार्टी विभाजन गर्नमै केन्द्रित रहेको आरोप लगाए।
