सलाम सुखानी,
तिम्रो बलिदानीलाई,
जसको कारण
हामी आज गणतन्त्रको सुनौलो किरणको
न्यानोपनमा पल्लवित भइरहेका छौं
प्रिय सुखानी,
हामी कसरी भुल्न सक्छौं
तिम्रो युगचेतना
जसले नेपाली भूमिमा
सामन्तवाद र साम्रज्यवाद विरुद्धको
रातो झण्डा फर्फरायो ।
निडर सुखानी,
हामी नतमस्तक छौं
तिम्रो हिम्मतिलो ललकार
ती कायर सत्ताधारीहरु विरुद्धको
जसले वीर पुरुषहरु
रामनाथ, वीरेन, नेत्र र नारायणलाई
गोली ठोके,
ती आततायीहरुलाई के थाहा ?
ती सहिदका रक्तबीजबाट
हजारौं होनाहार क्रान्तिवीरहरु
जन्मनेछन्
अनि
सामन्ती सत्ता उल्ट्याउने छन् भनेर ।
प्यारो सुखानी
तिमीले वर्गशत्र्रु खत्तम गर्ने उद्घोष गर्दै
झापा विद्रोह गर्यो
त्यसको ताप र रापले
सिंगो नेपाललाई लपेट्यो
जसको परिणाम
समाजवादउन्मुख दिशातर्फ
हिँडिरहेको छ मुलुक ।
तर केही रङ फेर्ने छेपाराहरु
शाकाहारी भएको उद्घोष गर्ने
बुढा सिंह, गोही र गिद्धहरु
आज पनि
यत्रतत्र सलवलाईरहेका छन्
न्यायोचित समाजवादी सपनामाथि
धावा बोल्न,
तर
चिन्ता नगर सुखानी
अव हजारौं होइन
लाखौलाख कमरेडहरु जन्मिसकेका छन्
क्रान्तिको झण्डा उठाउन तम्तयार
अन्तिम क्षणसम्म ।
मयूरबस्ती, बर्दिया
