काठमाडौं: प्रधानमन्त्री एवं नेकपा (एमाले) अध्यक्ष केपी शर्मा ओलीले सांसदहरूलाई सरकारले प्रस्तुत गरेको नीति तथा कार्यक्रमप्रति ढुक्क रहन र संसदमा प्रस्ट रूपमा समर्थन गर्न निर्देशन दिनुभएको छ।
शनिबार बालुवाटारमा आयोजित एमाले संसदीय दलको बैठकलाई सम्बोधन गर्दै प्रधानमन्त्री ओलीले विपक्षी दलको उद्देश्य नै विरोध गर्नु भएको टिप्पणी गर्नुभयो। “सत्य कुरा भए पनि विरोध गर्ने, असत्य कुरा भए पनि विरोध गर्ने प्रवृत्ति देखिएको छ,” उहाँले भन्नुभयो।
नीति तथा कार्यक्रमको कुनै पनि बुँदालाई विपक्षीले सकारात्मक रूपमा नलिएको भन्दै प्रधानमन्त्री ओलीले संसदमा व्यक्त गरिएका केही कथनहरू रेकर्डबाट हटाउन नहुने धारणा व्यक्त गर्नुभयो। “केही गलत कुरा बोल्यो भनेर रेकर्डबाट हटाउने माग गर्नु गलत हो। ती कुरा रेकर्डमै रहनुपर्छ, ताकि भविष्यका पुस्ताले पनि थाहा पाउन सकून् कि अघिल्ला पुस्ताले के बोलेका थिए,” उहाँले स्पष्ट पार्नुभयो।
सांसदहरूलाई अध्ययन गरेर संसदमा बोल्न आग्रह गर्दै प्रधानमन्त्री ओलीले एमालेलाई आकार मात्र होइन, विचार र मुद्दाको हिसाबले पनि ठूलो दल भएको बताउनुभयो। उहाँले सांसदहरूलाई संसदमा बोल्नुअघि आवश्यक बुँदाहरू तयार पारेर जान सुझाव दिनुभयो। “बुँदा लिएर गयौं भने कुनै कुरा छुट्दैन, र त्यसलाई व्याख्या गर्न पनि सजिलो हुन्छ,” उहाँले भने, “संसदमा उठ्ने गलत भनाइको प्रतिवाद गर्न पनि तयारीका साथ प्रस्तुत हुनुपर्छ।”
