काठमाडौं: नेपाली कांग्रेसका महामन्त्री विश्वप्रकाश शर्माले प्रधानमन्त्री केपी शर्मा ओलीको संविधान संशोधनबारेको अभिव्यक्तिलाई अस्वाभाविक भनेका छन्।
मंगलबार प्रधानमन्त्री ओलीले संविधान संशोधन २०८७ सालमा मात्रै हुने बताएका थिए। त्यसप्रति असन्तुष्टि जनाउँदै शर्माले आफ्नो धारणा व्यक्त गरेका हुन्।
बुधबार झापाको कचनकवलमा आयोजित कार्यक्रममा शर्माले भने, “संविधान संशोधन गर्नु आवश्यक छ। तर, २०८७ मा मात्रै संशोधन हुने प्रधानमन्त्रीज्यूको भनाइ आपत्तिजनक छ।”
शर्माले संविधान संशोधनका विषयमा प्रधानमन्त्रीलाई मात्र अधिकार नभएको उल्लेख गरे। कुन विषय र कहिले संशोधन गर्ने भन्ने निर्णय गठबन्धनभित्रको सल्लाह र सहमतिमा हुनुपर्ने उनको भनाइ थियो।
यसअघि, प्रधानमन्त्री ओलीले राष्ट्रिय सभामा नेकपा (एमाले) को बहुमत २०८७ सालमा मात्र पुग्ने र संविधान संशोधन त्यतिबेला मात्र सम्भव हुने बताएका थिए।
