काठमाडौँ: अख्तियार दुरुपयोग अनुसन्धान आयोगले विशेष अदालतका दुईवटा भ्रष्टाचार मुद्दामा सुनाइएको फैसलाप्रति असहमति जनाउँदै शुक्रबार सर्वोच्च अदालतमा पुनरावेदन गरेको छ।
आयोगले स्वास्थ्य निर्देशनालय धनकुटाका तत्कालीन निर्देशक तथा स्वास्थ्य उपकरण खरिद मूल्याङ्कन समितिका संयोजक चन्द्रदेव मेहताविरुद्ध विशेष अदालतमा दायर गरेको मुद्दामा करिब दुई करोड ८९ लाख ६६ हजार रुपैयाँ बिगो माग गरिएको थियो। विशेष अदालतले उक्त मुद्दामा गत असार ३१ गते फैसला सुनाएको थियो।
त्यस्तै, आयोगले रौतहटको कटहरिया नगरपालिकाका नगरप्रमुख अजयप्रकाशविरुद्ध सामुदायिक भवनको टायल्स फ्लोरिङ कार्यमा फिल्डमा नभएको कार्य देखाई भुक्तानी गरेको आरोपसहित भ्रष्टाचार मुद्दा दायर गरेको थियो। सो मुद्दामा आयोगले करिब १२ लाख ५२ हजार रुपैयाँ बिगो माग गरेको थियो। यसमा पनि विशेष अदालतले असार ३१ गते नै फैसला सुनाएको थियो।
दुवै फैसलालाई कानुनसम्मत नभएको ठहर गर्दै आयोगले सर्वोच्च अदालतमा पुनरावेदन दायर गरेको आयोगका प्रवक्ता राजेन्द्रकुमार पौडेलले जानकारी दिनुभयो।
