काठमाडौँ: नेपाल विद्युत प्राधिकरणका कार्यकारी निर्देशक हितेन्द्रदेव शाक्यले विद्युतीय सवारी साधनलाई प्राथमिकतासहित प्रवर्द्धन गर्न प्राधिकरण सक्रिय रहेको बताएका छन्।
शनिबार सगरमाथा संवादमा बोल्दै उनले नेपालमा विद्युतीय सवारी साधनको संख्या अझै न्यून रहेको भन्दै यसको प्रयोग बढाउन निजी क्षेत्रलाई समेत चार्जिङ स्टेशन निर्माणमा प्रोत्साहित गरिरहेको जानकारी दिए।
उनका अनुसार सुरुआतमा ६२ वटा मात्रै रहेका चार्जिङ स्टेशनहरू अहिले सात सयभन्दा बढी पुगेका छन्। प्राधिकरणले ती चार्जिङ स्टेसनहरूलाई ११ केभी क्षमताको मध्यम भोल्टेज विद्युत आपूर्ति गरेर समर्थन गरिरहेको उनले बताए।
“हामी विद्युतीय सवारी साधनलाई अपनाउँदै त्यसलाई प्रवर्द्धन गरिरहेका छौँ,” शाक्यले भने, “विद्युतीय सवारीको संख्या बढ्दो छ, तर पर्याप्त चार्जिङ पूर्वाधार नभएकाले देशभर चार्जिङ स्टेशनको संख्या बढाउनुपर्ने आवश्यकता छ।”
उनले नेपालमा ठूला ट्रक र बसहरू अझै पनि पेट्रोल तथा डिजेलमा निर्भर रहेको उल्लेख गर्दै, यस्ता साधनहरूलाई क्रमशः विद्युतीय बनाउने प्रयास भइरहेको बताए। तर यो रूपान्तरणको प्रक्रिया चुनौतीपूर्ण भएको उनको भनाइ छ।
“हामी २० वर्षदेखि विद्युतीय सवारीको विषयमा पहल गरिरहेका छौँ,” उनले भने, “तर ठूला ट्रक र बसहरू विद्युतीय बनाउने तथा त्यसको नियमन गर्ने कुरामा अझै काम गर्न सकिरहेका छैनौँ।”
शाक्यले हाल नेपालमा करिब ९५ प्रतिशत जनसङ्ख्याको पहुँचमा विद्युत् पुगेको पनि जानकारी दिए।
