काठमाडौँ: नागरिक उन्मुक्ति पार्टीका संरक्षक रेशम चौधरीलाई पक्राउ गर्न पत्र लेखेका सर्वोच्च अदालतका अधिकृत महिमानसिंह बिष्ट आफैं पक्राउ परेका छन्। स्रोतका अनुसार उनलाई जिल्ला प्रहरी परिसरमा राखिएको छ।
बिष्टले प्रहरीलाई पत्र पठाउँदै चौधरीलाई पक्राउ गर्न निर्देशन दिएका थिए। तर, उनले लेखेको पत्र अनाधिकृत भएको ठहर गर्दै उनलाई हिरासतमा लिइएको जनाइएको छ। सोही पत्रका आधारमा प्रहरीले चौधरीलाई पक्राउ गरी डिल्लीबजार कारागार चलान गरेको थियो।
यस प्रकरणपछि सर्वोच्च अदालतले चौधरीलाई रिहा गर्न नयाँ पत्र पठाउने तयारी गरेको छ। बुधबार बिहान जारी भएको भनिएको पत्रलाई आधिकारिक नमानिँदै सर्वोच्च अदालतले कारागार कार्यालय डिल्लीबजारलाई अर्को पत्रमार्फत चौधरीको रिहाइको प्रक्रिया अघि बढाएको हो।
सर्वोच्च अदालत प्रशासनको बैठकमा बिष्टसँग उनले पत्र लेख्नुको कारण सोधिएको थियो। जवाफमा उनले आफूले व्यक्तिगत विवेक प्रयोग गर्दै पत्र लेखेको बताएका छन्।
