मस्को । रुसी सेनालाई आत्मसमर्पण गर्न सिकाउने युट्युब भिडियो राखेको आरोपमा रुसले गुगललाई ठूलो जरिवाना गरेको छ।
रुसको एक अदालतले अमेरिकी कम्पनी अल्फाबेट अन्तर्गतको गुगललाई ३.८ मिलियन रूबल (करिब ४२,००० अमेरिकी डलर) जरिवाना गरेको हो। अदालतका अनुसार युट्युबमा ‘रूसको आत्मसमर्पण’ सम्बन्धी सामग्री होस्ट गरिएको पाइएपछि यो कारबाही गरिएको हो। रुसको सरकारी स्वामित्वमा रहेको तास समाचार एजेन्सीका अनुसार ती भिडियोहरूमा रूसी सैनिकहरूलाई आत्मसमर्पण गर्न प्रेरित गर्ने निर्देशनहरू समावेश थिए।
रुसले पछिल्ला वर्षहरूमा विदेशी टेक्नोलोजी कम्पनीहरूलाई कडा निगरानी गर्दै गैरकानूनी ठहरिएका सामग्री हटाउन आदेश दिँदै आएको छ। विशेष गरी युक्रेन युद्धसँग सम्बन्धित सामग्रीहरूलाई लिएर क्रेमलिनले लामो समयदेखि पश्चिमा सञ्चारमाध्यमहरूलाई ‘भ्रम फैलाएको’ आरोप लगाउँदै आएको छ।
यस जरिवाना बारेमा गुगलले कुनै आधिकारिक प्रतिक्रिया दिएको छैन।
यसअघि, रुसी राष्ट्रपति भ्लादिमिर पुटिनले गत डिसेम्बरमा गुगललाई अमेरिकी सरकारको ‘राजनीतिक हतियार’ भएको आरोप लगाएका थिए। उनले गुगलजस्ता प्रविधि कम्पनीहरूलाई पश्चिमा मुलुकहरूले आफ्नो ‘सूचना युद्ध’ को उपकरणका रूपमा प्रयोग गरिरहेको दाबी गरेका थिए।
