काठमाडौं । राष्ट्रिय प्रजातन्त्र पार्टीका प्रवक्ता मोहन कुमार श्रेष्ठले उच्च पदस्थ व्यक्तिहरूको सम्पत्ति छानबिन गर्ने सरकारी निर्णयलाई स्वागतयोग्य बताएका छन्।
सामाजिक सञ्जालमार्फत प्रतिक्रिया दिँदै श्रेष्ठले २०४६ पछि उच्च पदस्थहरूको सम्पत्ति छानबिन गर्ने विषय राप्रपाले लामो समयदेखि उठाउँदै आएको उल्लेख गरेका छन्। उनले यस विषयलाई पार्टीले सडक र सदन दुवैमा निरन्तर रूपमा उठाएको र पार्टीका दस्तावेज तथा चुनावी घोषणापत्रमा समेत प्राथमिकताका साथ समावेश गरेको बताए।
उनले सरकारले ‘शासकीय सुधारका १०० बुँदे कार्यसूची’मा यस विषयलाई समेट्नु सकारात्मक कदम भएको उल्लेख गर्दै बिना पूर्वाग्रह र प्रतिशोध निष्पक्ष रूपमा कार्यान्वयन गर्नुपर्ने धारणा राखेका छन्।
श्रेष्ठले सरकारलाई सुशासनको प्रत्याभूति दिलाउने गरी उक्त निर्णय प्रभावकारी रूपमा कार्यान्वयन गर्न आग्रह गरेका छन्।
