काठमाडौं: ‘लिटिल बुद्ध’ भनेर चिनिने रामबहादुर बमजनलाई उच्च अदालत जनकपुरले सफाइ दिएपछि उनी जेलमुक्त भएका छन्।
सर्लाहीकी एक नाबालिका अनुयायी ‘आनी’माथि यौन दुराचार गरेको आरोपमा सजाय सुनाइएका बमजनलाई उच्च अदालत जनकपुरले २०८१ चैत ६ गते सफाइ दिएको हो। सर्लाही जिल्ला अदालतको फैसला उल्ट्याउँदै न्यायाधीश नरिश्वर भण्डारी र खेमराज भट्टको इजलासले बमजनलाई मुद्दाबाट मुक्त गरिदिएको हो।
यसअघि जिल्ला अदालत सर्लाहीले २०८१ असारमा बमजनलाई १० वर्ष कैद र पाँच लाख रुपैयाँ क्षतिपूर्तिको सजाय सुनाएको थियो। उक्त फैसलाविरुद्ध उनले उच्च अदालतमा पुनरावेदन गरेका थिए। अदालतका उप-रजिष्ट्रार सुशील यादवका अनुसार, “दाबी नपुगेको ठहर गर्दै उच्च अदालतले फैसला उल्ट्याएको हो र मुद्दा नै खारेज भएको हो।”
फैसला सुनाउने समयमा बमजन सिन्धुपाल्चोकको जिल्ला कारागारमा थिए। उनी त्यहाँ अर्की अनुयायी फूलमाया रुम्बा बेपत्ता पारिएको मुद्दाको सुनुवाइका लागि स्थानान्तरण भएका थिए। अदालतको फैसला आएको चैत ६ गते राति पत्र प्राप्त भएको र चैत ७ गते उनलाई कारागारबाट छुटाइएको सिन्धुपाल्चोक कारागारका एक कर्मचारीले बताए। छुटेपछि बमजनलाई उनकी श्रीमती दीपशिखाले बुझेकी थिइन्।
सिन्धुपाल्चोकको मुद्दामा अदालतले उनलाई तीन लाख रुपैयाँ धरौटीमा कात्तिक २५ गते रिहा गर्न आदेश दिएको थियो। धरौटी बुझाए पनि प्रारम्भिक सुनुवाइ सकिएपछि उनी त्यहीँ कारागारमा बसेका थिए। अर्का अनुयायी सञ्चलाल वाइबा बेपत्ता प्रकरणमा भने सरकारी वकिल कार्यालयले अहिलेसम्म मुद्दा अगाडि बढाएको छैन।
यसअघि, २०८१ साउन ८ गते बमजनको आश्रमबाट बेपत्ता भएकी आनी चिनिमाया तामाङको प्रकरणमा नुवाकोट जिल्ला अदालतले उनलाई साधारण तारिखमा रिहा गरिसकेको छ।
बमजनविरुद्ध अन्य उजुरी र निवेदनहरू पनि छन्। बारा जिल्ला अन्तर्गत जितपुर सिमरा उपमहानगरपालिका–१८ का सुरेशकुमार आले बेपत्ता प्रकरणमा आफन्तले २०८० मंसिरमा प्रहरीमा निवेदन दिएका थिए, जुन अझै दर्ता भएको छैन। त्यसैगरी, सर्लाही बागमती नगरपालिका–१२ की रिता बोट बेपत्ता प्रकरणमा उजुरी परेको भए पनि सर्लाही प्रहरीले त्यसबारे स्पष्ट विवरण दिन सकेको छैन।
बमजनविरुद्ध २०८१ फागुनमा सर्लाही जिल्ला अदालतमा ८ करोड २७ लाख रुपैयाँ गैरकानुनी रूपमा आर्जन गरेको आरोपमा सम्पत्ति शुद्धीकरणसम्बन्धी मुद्दा दर्ता भएको छ। सो मुद्दा हालसम्म किनारा लागेको छैन।
कारागारबाट रिहा भएपछि बमजन अहिले कहाँ छन् भन्नेबारे प्रहरीले खोजी थालेको छैन। उनको स्थायी ठेगाना बारा जिल्लाको निजगढ नगरपालिका–१२ हो भने हालको ठेगाना काठमाडौंको बूढानीलकण्ठ नगरपालिका–६, हात्तीगौंडा हो। केन्द्रीय अनुसन्धान ब्युरो (CIB) ले २०८० पुस २५ गते उनलाई हात्तीगौंडास्थित घरबाटै पक्राउ गरेको थियो। उनकाे वास्तविक नाम रामलाल बमजन हो।
