काठमाडौँ: संयुक्त अरब इमिरेट्स (युएई)का उपप्रधानमन्त्री तथा विदेशमन्त्री महामहिम शेख अब्दुल्लाह बिन जायेद अल नाह्यान दुईदिने औपचारिक भ्रमणका लागि मङ्गलबार साँझ काठमाडौँ आइपुग्नुभएको छ।
त्रिभुवन अन्तरराष्ट्रिय विमानस्थलमा श्रम, रोजगार तथा सामाजिक सुरक्षामन्त्री शरत्सिंह भण्डारी, परराष्ट्र मन्त्रालयका सचिव अमृतबहादुर राई तथा मन्त्रालयका अन्य वरिष्ठ अधिकारीहरूले उहाँलाई स्वागत गर्नुभयो।
परराष्ट्र मन्त्रालयका अनुसार भ्रमणका क्रममा उपप्रधानमन्त्री नाह्यानले उच्चस्तरीय राजनीतिक भेटघाट गर्नुका साथै उपप्रधानमन्त्री तथा शहरी विकासमन्त्री प्रकाशमान सिंह नेतृत्वको प्रतिनिधिमण्डलसँग औपचारिक द्विपक्षीय वार्ता गर्नुहुने कार्यक्रम छ।
उहाँसँगै युएईका परराष्ट्र राज्यमन्त्री अहमद अली मोहम्मद अल सायेघ, आर्थिक तथा व्यापार मामिलाका सहायक मन्त्री सईद मुबारक राशिद अलहजेरी, ऊर्जा तथा दिगोपन मामिलाका सहायक मन्त्री अब्दुल्ला बलाला, नेपालका लागि युएईका राजदूत अब्दुल्ला जरवान अलशाम्सी तथा युएई सरकारका अन्य वरिष्ठ अधिकारीहरू पनि नेपाल आएका छन्।
उपप्रधानमन्त्री नाह्यान नेतृत्वको प्रतिनिधिमण्डल आजै अपराह्न युएई फर्किने कार्यक्रम रहेको परराष्ट्र मन्त्रालयले जनाएको छ।
