काठमाडौं: जल तथा मौसम विज्ञान विभागको मौसम पूर्वानुमान महाशाखाले हाल कोशी, मधेस, बागमती, गण्डकी प्रदेशका विभिन्न भूभाग तथा लुम्बिनी प्रदेशको पूर्वी क्षेत्रमा मनसुनी वायुको प्रभाव रहेको जनाएको छ।
त्यस्तै, देशको पश्चिमी भू–भागमा पश्चिमी वायु र स्थानीय वायुको आंशिक प्रभाव देखिएको छ। साथै, भारतको पश्चिम बंगाल आसपास बनेको न्यूनचापीय क्षेत्रको पनि आंशिक असर परेको छ।
महाशाखाका अनुसार आज दिउँसो देशभर आंशिकदेखि पूर्ण बदली रहनेछ। कोशी, बागमती, गण्डकी र लुम्बिनी प्रदेशका धेरै स्थानहरूमा तथा बाँकी प्रदेशका केही स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना छ।
त्यस्तै, कोशी, बागमती, गण्डकी र लुम्बिनी प्रदेशका एक–दुई स्थानहरूमा भारीदेखि अति भारी वर्षाको सम्भावना पनि छ। उच्च–पहाडी तथा हिमाली क्षेत्रका थोरै स्थानहरूमा हल्का वर्षा वा हिमपातको सम्भावना उल्लेख गरिएको छ।
आज राति पनि कोशी, मधेस, बागमती, गण्डकी र लुम्बिनी प्रदेशका धेरै स्थानहरूमा, तथा अन्य प्रदेशका केही स्थानहरूमा मेघगर्जन र चट्याङसहित हल्कादेखि मध्यम वर्षा हुन सक्ने अनुमान गरिएको छ।
कोशी, मधेस, गण्डकी र लुम्बिनी प्रदेशका केही भूभागहरूमा राति भारीदेखि अति भारी वर्षा हुनसक्ने जनाइएको छ। साथै, कोशी, बागमती र गण्डकीका उच्च–पहाडी तथा हिमाली क्षेत्रका केही स्थानहरूमा, र बाँकी प्रदेशका उच्च भूभागहरूमा एक–दुई स्थानमा हल्का वर्षा वा हिमपातको सम्भावना रहेको छ।
