काठमाडौँ:जल तथा मौसम विज्ञान विभाग अन्तर्गत मौसम पूर्वानुमान महाशाखाका अनुसार हाल देशको पश्चिम र मध्य भूभागमा पश्चिमी वायु तथा स्थानीय वायुको प्रभाव देखिएको छ भने कोशी प्रदेशका अधिकांश भूभागमा मनसुनी वायु सक्रिय रहेको छ।
यस प्रणालीको प्रभावस्वरूप कोशी, गण्डकी, लुम्बिनी र कर्णाली प्रदेशसहित देशका पहाडी भूभागहरूमा आंशिकदेखि सामान्य बदली रहेको छ। बाँकी भूभागमा मौसम मुख्यतः सफा रहेको छ। सुदूरपश्चिम र कर्णाली प्रदेशका केही स्थानहरूमा तथा कोशी, गण्डकी र लुम्बिनी प्रदेशका एक–दुई स्थानमा चट्याङसहित हल्का वर्षा भइरहेको विभागले जनाएको छ।
दिउँसोको पूर्वानुमान अनुसार:
देशभर आंशिकदेखि सामान्य बदली रहनेछ। कोशी, सुदूरपश्चिम, गण्डकी र कर्णाली प्रदेशका पहाडी भूभागका केही स्थानहरूमा तथा अन्य क्षेत्रका एक–दुई स्थानमा चट्याङसहित हल्कादेखि मध्यम वर्षाको सम्भावना रहेको छ।
त्यस्तै, कोशी र सुदूरपश्चिम प्रदेशका उच्च पहाडी तथा हिमाली क्षेत्रका केही स्थानहरूमा र अन्य उच्च पहाडी तथा हिमाली भूभागका एक–दुई स्थानमा हल्का वर्षासहित हिमपातको सम्भावना छ।
रातिको मौसमको पूर्वानुमान:
लुम्बिनी प्रदेशसहित देशका पहाडी भूभागका केही स्थानहरूमा र अन्य भागका एक–दुई स्थानमा चट्याङसहित हल्कादेखि मध्यम वर्षाको सम्भावना रहेको छ। साथै, उच्च पहाडी तथा हिमाली भूभागका केही स्थानहरूमा हल्का वर्षासहित हिमपात हुने सम्भावना पनि रहेको महाशाखाले जनाएको छ।
