काठमाडौं । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन)ले आगामी दिनमा नेपाल–भारत सम्बन्ध अझ सुदृढ र परिणाममुखी हुने विश्वास व्यक्त गरेका छन्।
सोमबार साँझ भारतीय प्रधानमन्त्री नरेन्द्र मोदीले बालेन र रास्वपाका सभापति रवि लामिछानेसँग टेलिफोन संवाद गरी निर्वाचन सफलताका लागि बधाई दिएका थिए। मोदीले सामाजिक सञ्जालमार्फत दुवै नेतालाई बधाई दिँदै नयाँ बन्ने सरकारका लागि शुभकामना व्यक्त गरेका थिए। साथै, साझा प्रगति, समृद्धि र जनकल्याणका लागि भारत सरकार सहकार्य गर्न प्रतिबद्ध रहेको उल्लेख गरेका थिए।
मोदीको उक्त सन्देशमा प्रतिक्रिया दिँदै बालेनले धन्यवाद व्यक्त गर्दै नेपाल–भारतबीचको ऐतिहासिक, घनिष्ठ र बहुआयामिक सम्बन्धलाई आगामी दिनमा अझ प्रगाढ बनाउने विश्वास व्यक्त गरेका छन्।
बालेनले लेखेका छन्, “शुभकामनाका लागि धन्यवाद, सम्माननीय प्रधानमन्त्री नरेन्द्र मोदीज्यू। नेपाल–भारतबीच विद्यमान ऐतिहासिक, घनिष्ठ तथा बहुआयामिक सम्बन्धलाई आगामी दिनहरूमा अझ सुदृढ र परिणाममुखी बनाउन हामी सहकार्य गर्ने विश्वास व्यक्त गर्दछु।”
उनले भारतले लगातार दुई पटक विश्वकप उपाधि जित्न सफल भएकोमा भारत सरकार र भारतीय जनतालाई बधाईसमेत दिएका छन्।
रास्वपाले बालेनलाई नेपालको प्रधानमन्त्रीका रूपमा अघि सार्ने निर्णय गरेको छ। प्रतिनिधिसभा निर्वाचनमा उनले नेकपा (एमाले)का अध्यक्ष केपी शर्मा ओलीलाई भारी मतान्तरले पराजित गर्दै झापा–५ बाट विजयी भएका थिए।
