काठमाडौं: असोज दोस्रो साता आएको बाढीपहिरोका कारण क्षति पुगेको माथिल्लो तामाकोशी जलविद्युत् आयोजना पुनः सञ्चालनमा नआउँदासम्म साँझको समयमा औद्योगिक ग्राहकका लागि विद्युत् कटौती गरिने नेपाल विद्युत् प्राधिकरणले जानकारी गराएको छ।
राष्ट्रिय प्रसारण लाइनमा जोडिएको ४५६ मेगावाट क्षमताको माथिल्लो तामाकोशी सबैभन्दा ठूलो जलविद्युत् आयोजना हो। यसको उत्पादन बन्द हुँदा हिउँदयाममा विद्युत् व्यवस्थापनमा चुनौती उत्पन्न भएको प्राधिकरणका कार्यकारी निर्देशक कुलमान घिसिङले बताए। साँझको समयमा विद्युत् खपत उच्च हुने भएकाले (पिक आवर) औद्योगिक ग्राहकहरूलाई आपूर्ति कटौती गर्नुपर्ने अवस्था रहेको उनको भनाइ छ।
माथिल्लो तामाकोशी पुनः सञ्चालनमा नआएसम्म औद्योगिक क्षेत्रका लागि विद्युत् केही कटौती गरिने भए पनि अन्य ग्राहकलाई विद्युत् आपूर्ति अविच्छिन्न गरिने प्राधिकरणले स्पष्ट पारेको छ।
हिउँदयाममा खोला र नदीको पानीको बहाव कम हुँदा नदी प्रवाही (आरओआर) जलविद्युत् आयोजनाको उत्पादन क्षमता एक तिहाइले घट्छ। यस्तो अवस्थामा, साँझको पिक आवरमा भारतबाट विद्युत् आयात गर्न नसकिने भएकाले औद्योगिक क्षेत्रमा विद्युत् कटौती गर्नुपर्ने बाध्यता रहेको प्राधिकरणले जनाएको छ।
माथिल्लो तामाकोशी आयोजना यही पुस १० गतेभित्र विद्युत् उत्पादनमा फर्काउने उद्देश्यले मर्मत कार्य भइरहेको छ। भारतको केन्द्रीय विद्युत् प्राधिकरणले आगामी चैत २ गते (मार्च १५, २०२५) सम्म ढल्केबर-मुजफ्फपुर ४०० केभी क्रसबोर्डर प्रसारण लाइनबाट ६०० मेगावाट र टनकपुर-महेन्द्रनगर १३२ केभी प्रसारण लाइनमार्फत ५४ मेगावाट गरी दैनिक ६५४ मेगावाट विद्युत् आयातको अनुमति दिएको छ। तर साँझको पिक आवर (५ देखि ९ बजेसम्म) विद्युत् आयात गर्न रोक लगाइएको छ।
चैत ३ गते २०८१ देखि असार १६ गते २०८२ (मार्च १६–जुन ३०, २०२५) सम्म सौर्य घण्टा अर्थात बिहान ६ बजेदेखि साँझ ६ बजेसम्म मात्र विद्युत् आयात गर्न अनुमति दिइएको छ। कार्यकारी निर्देशक घिसिङले माथिल्लो तामाकोशी बन्द रहेको र साँझ पिक आवरमा भारतबाट विद्युत् आयात गर्न नसकिने भएकाले औद्योगिक क्षेत्रमा आपूर्ति कटौती गर्नुपर्ने अवस्था बनेको बताए।
