काठमाडौं: नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले माओवादी घटकहरूलाई एकत्रित गर्दै छिट्टै ठूलो आन्दोलन सुरु गर्ने घोषणा गरेका छन्।
अन्तर्राष्ट्रिय श्रमिक दिवसको अवसरमा बिहीबार काठमाडौंमा आयोजित एक कार्यक्रममा प्रचण्डले मुलुकमा विद्यमान समस्याहरूको समाधानका लागि आन्दोलन र क्रान्तिमार्फत अघि बढ्ने स्पष्ट संकेत दिए। उनले आन्दोलन शान्तिपूर्ण हुने बताउँदै, यदि राज्यले बल प्रयोग गरी दमन गर्न खोजेमा जनताको विद्रोहको अधिकारलाई रोक्न नसकिने चेतावनी दिए।
प्रचण्डले सरकार सुशासनविरोधी र भ्रष्टाचार समर्थक गतिविधिमा संलग्न रहेको आरोप लगाउँदै माओवादी केन्द्र त्यसविरुद्ध खबरदारी गरिरहेको बताए। उनले वर्तमान व्यवस्थालाई उल्ट्याउने गम्भीर प्रयासहरू भइरहेको उल्लेख गर्दै, यस्ता प्रयासलाई परास्त गरेरै छाड्ने दृढता व्यक्त गरे। यथास्थितिवादी पार्टीहरूसँग मिलेर सरकारमा जाने माओवादीको कुनै रुचि नरहेको स्पष्ट पार्दै उनले आफ्नो पार्टी जनताको पक्षमा रहेको दाबी गरे।
उनका अनुसार भ्रष्टाचारको मूल कारण शासकीय स्वरूप र वर्तमान निर्वाचन प्रणाली हुन्। त्यसैले प्रत्यक्ष निर्वाचित कार्यकारी राष्ट्रपतिको व्यवस्था र पूर्ण समानुपातिक निर्वाचन प्रणाली आवश्यक भएको उनको धारणा छ।
प्रचण्डले जनयुद्धको जगमा संविधानमा श्रमजीवी वर्गका हक–अधिकार सुनिश्चित गरिए पनि ती व्यवहारमा कार्यान्वयन हुन नसकेको स्वीकार गर्दै, संविधानको समिक्षा अपरिहार्य रहेको बताए।
