काठमाडौं । मस्को नजिकै रहेको एक गोदाममा सोमबार राति भएको युक्रेनी ड्रोन आक्रमणमा कम्तीमा पाँच जनाको मृत्यु भएको छ भने १० जना घाइते भएका छन्। घटनाको पुष्टि मस्को क्षेत्रका गभर्नरले गरेका छन्।
रुसी अधिकारीहरूले आक्रमणको ठ्याक्कै लक्ष्य सार्वजनिक नगरे पनि पछिल्ला हप्ताहरूमा युक्रेनले ‘वाइल्डबेरिज’ कम्पनीका गोदामहरूलाई लक्षित गर्दै लगातार ड्रोन आक्रमण गरिरहेको जनाएको छ। ‘वाइल्डबेरिज’लाई प्रायः ‘रुसको अमेजन’ भनेर चिनिन्छ।
युक्रेनले ती गोदामहरू रुसी सेनालाई आवश्यक सामग्री आपूर्ति गर्न प्रयोग भइरहेको दाबी गरेको छ। तर, रुसले उक्त दाबी अस्वीकार गर्दै आएको छ।
स्थानीय अधिकारीहरूका अनुसार सोमबार राति सेन्ट पिटर्सबर्ग र त्वेर क्षेत्रमा रहेका वाइल्डबेरिजका गोदामहरू पनि आक्रमणको निशानामा परेका थिए।
उता, रुसले पनि युक्रेनमाथि आक्रमण जारी राखेको छ। रुसी आक्रमणमा कम्तीमा चार जनाको मृत्यु भएको छ भने अन्य धेरै व्यक्ति घाइते भएका छन्।
यसैबीच, रुसी रक्षा मन्त्रालयले आफ्नो हवाई प्रतिरक्षा प्रणालीले रातभरिमा ३२० वटा युक्रेनी ड्रोन खसालेको दाबी गरेको छ। यद्यपि, यी दाबीहरू स्वतन्त्र रूपमा पुष्टि हुन सकेका छैनन्।
