काठमाडौँ:भारतीय अभिनेता आमिर खानको नयाँ फिल्म ‘सितारे जमिन पर’ को ट्रेलरले भारतमा चर्चा पाइरहेका बेला, नेपालमा भने फिल्मको पोस्टरमा प्रयोग भएको टाइटल टाइपोग्राफीले बढी ध्यान खिचेको छ। यसको कारण छन् नेपाली ग्राफिक डिजाइनर आनन्द महर्जन।
आनन्दले यसअघि पनि आमिरको ‘लालसिंह चड्डा’, शाहरूखको ‘जवान’, सलमानको ‘ट्युबलाइट’, अक्षयको ‘सूर्यवंशी’ लगायत ६०–७० बलिउड फिल्मका टाइटल टाइपोग्राफीमा काम गरिसकेका छन्। उनले बलिउडमा काम ‘काबिल’ फिल्मबाट सुरु गरेका थिए र हाल भारतको वान-एच-वान कम्पनीसँग सहकार्यमा छन्।
नेपालमा भने उनी ‘छड्के’, ‘कबड्डी २ र ४’, ‘महाजात्रा’, ‘जारी’, ‘दिमाग खराब’ लगायत फिल्ममा काम गरेर चर्चित छन्। ‘छड्के’ को पोस्टर डिजाईन प्रतियोगिता जित्दै उनले यो यात्रा सुरु गरेका थिए।
आनन्द हाल ‘हाम्रो पात्रो’ मा कार्यरत छन् र उनले बनाएका फन्टहरू — आनन्द, आनन्द नमस्ते, उकाली ओराली, यताउती, फन्को आदि — लोकप्रिय छन्। उनले ग्यालेक्सी टिभीका लागि पनि विशेष फन्ट बनाएका थिए।
उनले हालै चर्चा पाएको ‘सितारे जमिन पर’ को टाइटल फन्ट नभई टाइपोग्राफी भएको बताएका छन्। फन्ट र टाइपोग्राफीमा भिन्नता बारे उनी भन्छन्, “फन्ट बनाउन वर्ष लाग्न सक्छ तर टाइपोग्राफी केही घण्टामै बन्न सक्छ।”
उनको काम रञ्जना लिपिमा पनि उल्लेखनीय छ। उनी क्यालिजात्रा संस्थाका अध्यक्ष हुन्, जसले भारतको ‘टाइप’ संस्थासँग सहकार्य गरेर ‘नित्या रञ्जना’ फन्ट बनाएको थियो। यो फन्टले प्रतिष्ठित D&AD Yellow Pencil Award र Communication Arts Typography Award of Excellence जस्ता सम्मान जितेको छ।
उनले रञ्जना लिपिको एप बनाएका छन् र अनलाइनमार्फत नेपाल भाषा सिकाउने काम पनि गर्दै छन्। हाल उनी नेपाल भाषाका साहित्यकार दुर्गालाल श्रेष्ठको हस्तलिखित अक्षरलाई कम्प्युटर फन्टमा रूपान्तरण गर्ने परियोजनामा जुटेका छन्, जुन केही समयपछि सार्वजनिक गरिनेछ।
आनन्दले एआई (AI) प्रविधिको प्रयोगले डिजाइन क्षेत्रमा चुनौतीसँगै अवसर पनि ल्याएको बताउँछन्। “समयसँगै हिँड्न जानिए फाइदा नै हुन्छ,” उनी भन्छन्।
