काठमाडौं: काठमाडौं उपत्यका अपराध अनुसन्धान कार्यालय, टेकुले बैंकिङ कसुर मुद्दामा फरार अभियुक्त विजय लम्साललाई पक्राउ गरेको छ।
प्रहरीका अनुसार लम्साल काठमाडौं महानगरपालिका वडा नम्बर ३१ का स्थायी बासिन्दा हुन् भने हाल बुढानीलकण्ठ नगरपालिका वडा नम्बर ४ मा बस्दै आएका थिए। उनी रु. १४ करोड ९५ लाख बराबरको ठगी मुद्दामा फरार रहेका थिए।
काठमाडौं जिल्ला अदालतबाट पक्राउ पुर्जी जारी भएपछि विशेष प्रहरी टोलीले चैत ८ गते काठमाडौं महानगरपालिका वडा नम्बर २ बाट उनलाई पक्राउ गरेको हो। प्रहरीका अनुसार लम्सालविरुद्ध अन्य चारवटा मुद्दा विभिन्न प्रहरी कार्यालयहरूमा दर्ता रहेका छन्।
प्रहरीले थप अनुसन्धान जारी रहेको जनाएको छ। साथै, बैंकिङ कसुर तथा आर्थिक ठगी सम्बन्धी कुनै पनि जानकारी भएमा प्रहरीलाई सहकार्य गर्न आग्रह गरेको छ।
