काठमाडौँ — गैरआवासीय नेपाली संघ (एनआरएनए) को उच्चस्तरीय न्यायिक तथा मेलमिलाप समितिले संस्थाभित्र बृहत् एकता कायम गर्नका लागि औपचारिक वार्ता प्रक्रिया सुरु गरेको छ।
गत मे ३–४ मा काठमाडौँमा सम्पन्न एकता महाधिवेशनबाट २०२५–२७ कार्यकालका लागि निर्वाचित महेशकुमार श्रेष्ठ नेतृत्वको कार्यसमितिले, सो महाधिवेशनमा सहभागी नभएका पक्षहरूलाई समेत समेट्ने उद्देश्यका साथ वार्ता प्रारम्भ गरेको हो।
राजेन्द्रकुमार (आरके) शर्माको संयोजकत्वमा गठन गरिएको पाँच सदस्यीय समितिलाई पूर्णता दिएलगत्तै वार्ता प्रक्रिया सुरु भएको हो। समितिमा जानकी गुरुङ, सुनील शाह, नारायण आचार्य र शनि ओली सदस्यका रूपमा रहेका छन्।
समितिको पहिलो बैठकले संस्थागत एकतालाई मूर्त रूप दिनका लागि संस्थाका पूर्व अध्यक्षहरू, राष्ट्रिय समन्वय परिषद् (एनसीसी) अध्यक्षहरू तथा सरोकारवालाहरूसँग व्यापक छलफल गर्ने निर्णय गरेको छ।
बैठकमा आमन्त्रित अतिथिका रूपमा सहभागी अध्यक्ष महेशकुमार श्रेष्ठ र महासचिव बाबुराम (बीआर) लामाले वार्तामार्फत संस्थागत एकता कायम गर्न हर सम्भव प्रयास गर्ने प्रतिबद्धता जनाएका थिए। साथै, समितिले गर्ने निर्णय कार्यसमितिले स्वीकार गर्ने स्पष्ट आश्वासन पनि उनीहरूले दिएका थिए।
सर्वोच्च अदालतको आदेशअनुसार, बद्री केसी नेतृत्वको पक्षले आफ्नो कार्यकाल अक्टोबर १४, २०२५ सम्म रहने दाबी गरेको छ, जसपछि उक्त कार्यसमिति स्वतः भंग हुनेछ।
