काठमाडौं । बालेन्द्र शाहले पद तथा गोपनीयताको शपथलगत्तै सिंहदरबारमा सबै सचिवलाई बोलाएर सरकारको गति र मर्मअनुसार काम गर्न कडा निर्देशन दिएका छन्।
शुक्रबार भएको छोटो भेटघाटमा प्रधानमन्त्री शाहले सचिवहरूलाई मन्त्रीहरूको निर्देशनअनुसार काम गर्न स्पष्ट रूपमा आग्रह गरेका थिए। स्रोतका अनुसार उनले सरकारको ‘स्पिड’ (गति) र ‘स्पिरिट’ (मर्म) अनुसार काम गर्न नसक्ने भए मार्गप्रशस्त गर्न समेत भनेका छन्।
प्रधानमन्त्रीले सचिवहरूलाई नियम–कानुन देखाएर कामबाट पन्छिने वा मन्त्रीहरूलाई ‘पढाउने’ प्रवृत्ति नदेखाउन निर्देशन दिएका छन्। “सरकारले भनेअनुसार डेलिभरी दिनु तपाईंहरूको जिम्मेवारी हो,” उनले भनेका थिए।
उनले ‘सिभिलियन सुप्रिमेसी’ कायम गर्नुपर्नेमा जोड दिँदै निजामती सेवाको मुख्य दायित्व जनताको सेवा भएको उल्लेख गरेका थिए।
भेटघाट निकै छोटो रहेको र सचिवहरूलाई आफ्नो धारणा राख्ने अवसर नदिइएको स्रोतहरूले बताएका छन्। “प्रधानमन्त्रीसँग भएका बैठकमध्ये अहिलेसम्मकै छोटो यही थियो,” एक सचिवले बताए।
यसअघि मन्त्रिपरिषद्को पहिलो बैठकले शासकीय सुधारका १०० बुँदे कार्यसूची सार्वजनिक गरिसकेको छ, जसअनुसार ७ दिनदेखि एक हजार दिनसम्मका कार्ययोजना तय गरिएको छ।
प्रधानमन्त्री शाहले मन्त्रीहरूको भावना बुझेर काम गर्न, समस्या देखाउनेभन्दा समाधान खोज्ने र प्रशासनिक ढिलासुस्ती अन्त्य गर्नेमा जोड दिएका छन्।
