काठमाडौँ: ‘राष्ट्रका लागि हप्ताको दुई घण्टा स्वयंसेवा’ भन्ने नाराका साथ शङ्खमूलस्थित बाग्मती नदी किनारमा भएको सफाइ अभियानबाट नकुहिने दुई मेट्रिक टन फोहर व्यवस्थापन गरिएको छ।
बाग्मती सफाइ महाअभियानको ६१८औँ हप्तामा शङ्खमूल दोभानस्थित बाग्मती सेतो पुल क्षेत्र सरसफाइ गरिएको थियो। सफाइ कार्यक्रममा अधिकार सम्पन्न बाग्मती सभ्यता एकीकृत विकास समितिका पदाधिकारी एवं कर्मचारी, स्थानीय बासिन्दा तथा आलोकनगर बाग्मती सफाइ समूहको सक्रिय सहभागिता रहेको अभियानकर्मी किशोरसिंह शाहीले जानकारी दिनुभयो।
यही चैत ९ गते शनिबार महाअभियानको ६१९औँ हप्ताका अवसरमा विशेष कार्यक्रम आयोजना गरिने भएको छ। सरसफाइ अभियानमा व्यापक सहभागिताका लागि महाअभियानले सर्वसाधारणलाई अपिल गरेको छ।
विसं २०७० जेठ ५ गतेदेखि निरन्तर सञ्चालन हुँदै आएको बाग्मती सफाइ महाअभियान अन्तर्गत प्रत्येक शनिबार सफाइ कार्यक्रम सञ्चालन हुँदै आएको छ। यस अभियानबाट प्रभावित भई देशभरका प्रमुख नदी तथा सहर गरी १०८ भन्दा बढी स्थानमा सफाइ भइरहेको अभियानकर्मी डा. माला खरेलले जानकारी दिनुभयो।
