पोखरा: गण्डकी प्रदेश सभा सदस्य तथा पूर्वमन्त्री दीपक मनाङेले आफू सम्पर्कविहीन भएको भन्ने समाचारको खण्डन गरेका छन्। शुक्रबार जारी एक विज्ञप्तिमा प्रदेश सभा सदस्य मनाङेले यस्तो समाचारप्रति असहमति जनाउँदै त्यसलाई असत्य र भ्रामक भनेका छन्।
केही दिनअघि सर्वोच्च अदालतबाट दोषी ठहर भएपछि उनी सम्पर्कविहीन भएको खबर सार्वजनिक भएको थियो।
यद्यपि, उनले सर्वोच्चको फैसला आउने दिनदेखि लगातार सञ्चारमाध्यमहरूबाट आएका कलका कारण केही समयका लागि आफ्नो मोबाइल बन्द गरेको कुरा स्वीकार गरेका छन्। उनले भनेका छन् – “यसै विषयलाई लिएर सञ्चारमाध्यमहरूमा गलत समाचार आइरहेको पाएको छु, जसमा मेरो गम्भीर आपत्ति छ।”
उनले सर्वोच्च अदालतमा विचाराधीन मुद्दाको फैसला आफ्नो कानुनी सल्लाहकारमार्फत थाहा पाएको र फैसलाको पूर्णपाठ लिखित रुपमा प्राप्त भएपछि अदालतमा उपस्थित हुने बताएको पनि उल्लेख गरेका छन्।
