काठमाडौं । यही फागुन २१ गते हुने प्रतिनिधिसभा सदस्य निर्वाचनका लागि देशभरका १६५ वटै निर्वाचन क्षेत्रमा आवश्यक सामग्री पुगेको निर्वाचन आयोगले जनाएको छ।
आयोगका सहायक प्रवक्ता कुलबहादुर जिसीका अनुसार पहिलो हुने निर्वाचित हुने प्रणाली तथा समानुपातिक प्रणालीतर्फ गरी चार करोड ११ लाख ५३ हजार मतपत्र ७७ वटै जिल्लामा पठाइसकिएको छ। प्रतिनिधिसभा सदस्य निर्वाचन, २०८२ को पूर्वतयारी अन्तिम चरणमा पुगेको आयोगले जनाएको छ।
स्वीकृत कार्यतालिकाअनुसार सबै व्यवस्थापकीय काम तोकिएको समयमै अघि बढिरहेको छ। दुवै प्रणालीतर्फका मतपत्र छपाइ सम्पन्न भई सम्बन्धित जिल्लामा पुगेका छन्। केही सामग्री भने जिल्लास्तरमै व्यवस्थापन गरिनेछ। निर्वाचन अधिकृतको कार्यालयमार्फत मतदान अधिकृतलाई आवश्यक सामग्री हस्तान्तरण गरिने आयोगले स्पष्ट पारेको छ।
मतदाता शिक्षासम्बन्धी विशेष कार्यक्रम फागुन ३ गतेदेखि सुरु भई फागुन १७ गतेसम्म सञ्चालन हुने जनाइएको छ। यो कार्यक्रम ७५३ स्थानीय तहका ६ हजार ७४३ वडामा निरन्तर चल्नेछ।
निर्वाचन आचारसंहिता पालना र अनुगमनलाई निरन्तरता दिइएको छ। केन्द्रीय आचारसंहिता अनुगमन समितिलगायतका संयन्त्र सक्रिय रूपमा परिचालित छन्।
यसैबीच, फागुन ४ गतेदेखि राजनीतिक दलहरूले औपचारिक रूपमा चुनावी प्रचारप्रसार सुरु गरेका छन्। प्रचारप्रसारलाई कानुन र आचारसंहिताको दायराभित्र रही शिष्ट र मर्यादित बनाउन आयोगले दल र उम्मेदवारहरूलाई निर्देशन दिएको छ।
