काठमाडौँ: राष्ट्रिय मानवअधिकार आयोगले प्रेस तथा अभिव्यक्ति स्वतन्त्रताको संरक्षण र सम्मानप्रति संवेदनशील बन्न सरकारलाई आग्रह गरेको छ। विश्व प्रेस स्वतन्त्रता दिवसको अवसरमा आयोगले आज सार्वजनिक गरेको विज्ञप्तिमा संविधान तथा राष्ट्रिय र अन्तर्राष्ट्रिय कानूनद्वारा प्रत्याभूत पत्रकारको स्वतन्त्रता सुनिश्चित गर्न आग्रह गरिएको छ।
आयोगले प्रेस स्वतन्त्रता कायम राख्न र पत्रकारको सुरक्षा सुनिश्चित गर्न सरकारसहित सम्बन्धित सबै पक्षलाई जिम्मेवार बन्न आग्रह गरेको छ।
आयोगले हालै भएका दुःखद घटनाप्रति पनि गहिरो चिन्ता व्यक्त गरेको छ। चैत १५ गते समाचार सङ्कलनका क्रममा तीनकुनेमा पत्रकार सुरेश रजकको जलेर मृत्यु भएको तथा शिक्षक आन्दोलनको समाचार कभर गर्ने क्रममा पत्रकार सविना कार्की घाइते भएको घटनाले प्रेस स्वतन्त्रताको स्थितिमा चुनौती देखिएको आयोगले जनाएको छ।
