काठमाडौं: नेपाल विद्युत प्राधिकरणले संसदको सार्वजनिक लेखा समितिलाई डेडिकेटेड र ट्रंक लाइनको सबै विवरण समेटिएको तथ्याङ्क आज बुझाएको छ।
संसदको सार्वजनिक लेखा समितिले माग गरेबमोजिम प्राधिकरणले सो तथ्याङ्क बुझाएको हो।
समितिले डेडिकेटेड र ट्रंक लाइन प्रयोग गरेका उद्योग प्रतिष्ठानको टाइम अफ डे (टिओडी) मिटरको सबै विवरण पेस गर्न प्राधिकरणलाई यसअघि नै निर्देशन दिएको थियो। सोही निर्देशनका आधारमा प्राधिकरणका कार्यकारी निर्देशक कुलमान घिसिङले सबै विवरण उपलब्ध गराइएको जानकारी दिए।
‘टिओडी लोड प्रोफाइल’, टीओडी डाउनलोड, लगसिट, एमपावरको बिल, छुट बिल, विभिन्न तहका अदालतले गरेको फैसलालगायतका सबै विवरण प्राधिकरणले लेखा समितिलाई बुझाएको प्राधिकरणको भनाइ छ। डेडिकेटेड र ट्रंक लाइन महसुलको विषयलाई लिएर चौतर्फी बहस भइरहेको छ।
