काठमाडौँ– प्रधानमन्त्री केपी शर्मा ओलीले इस्लाम धर्मावलम्बीहरूद्वारा मनाइने पवित्र पर्व ईदको अवसरमा शुभकामना व्यक्त गर्नुभएको छ।
प्रधानमन्त्री ओलीले आज सामाजिक सञ्जालमार्फत शुभकामना सन्देश जारी गर्दै एक महिना लामो रोजा समाप्त भएपछि इस्लाम समुदायले उल्लासपूर्वक इदुल फित्र मनाउने परम्परा रहेको उल्लेख गर्नुभएको छ।
उहाँले सन्देशमा भन्नुभएको छ, “आज इस्लाम धर्मावलम्बीहरूले मनाउने महत्त्वपूर्ण र पवित्र पर्व ईद, एक महिना लामो रोजा व्रत पूरा भएको छ। रोजा पूरा भएको खुसियालीमा इस्लाम समुदायले इदुल फित्र मनाउँदै छन्। ईद पर्वको अवसरमा सबैलाई शुभकामना।”
ईद पर्व प्रेम, दानशीलता, सामाजिक सहयोग र आध्यात्मिक समर्पणको प्रतीक मानिन्छ। यस चाडले समुदायबीचको सम्बन्धलाई अझ बलियो बनाउने परम्परागत विशेषता बोकेको छ।
