विराटनगर । आगामी फागुन २१ गते हुने प्रतिनिधिसभा निर्वाचनलाई शान्तिपूर्ण, निष्पक्ष र भयमुक्त वातावरणमा सम्पन्न गराउन नेपाल–भारत सीमा क्षेत्रमा सुरक्षा व्यवस्था कडा पारिने भएको छ। निर्वाचन अवधिभर सम्भावित अवाञ्छित गतिविधि रोक्न सीमा नाका ७२ घण्टाका लागि पूर्ण रूपमा बन्द गर्ने निर्णय गरिएको छ।
नेपालतर्फ कोशी प्रदेशअन्तर्गत झापा, मोरङ र सुनसरी जिल्लाका सुरक्षा प्रमुख तथा भारततर्फ किशनगञ्ज, अररिया र सुपौल जिल्लाका सुरक्षा अधिकारीबीच भएको संयुक्त बैठकले यस्तो सहमति गरेको हो। बैठकले सीमा क्षेत्रमा समन्वयात्मक सुरक्षा रणनीति अपनाउने निर्णय समेत गरेको छ।
सहमति अनुसार फागुन १८ गते रातिदेखि फागुन २१ गते रातिसम्म सीमा नाका बन्द रहनेछ। यस अवधिमा अत्यावश्यक सेवाबाहेक अन्य सबै प्रकारका आवागमनमा रोक लगाइने प्रशासनले जनाएको छ।
प्रशासनका अनुसार निर्वाचनका बेला सीमा पारबाट हुन सक्ने चलखेल, अवैध प्रवेश तथा अन्य आपराधिक गतिविधि नियन्त्रण गर्न यो कदम प्रभावकारी हुने अपेक्षा गरिएको छ। मोरङका सहायक प्रमुख जिल्ला अधिकारी सरोज कोइरालाले निर्वाचन प्रचारप्रसारका क्रममा भारतीय नम्बर प्लेटका सवारी साधनको अनियन्त्रित आवागमन रोक्न भारतीय सुरक्षा निकायसँग आवश्यक समन्वय गरिएको जानकारी दिए।
त्यसैगरी, बैठकले सीमा क्षेत्रमा संयुक्त गस्ती बढाउने, तेस्रो मुलुकका नागरिकको अनाधिकृत आवतजावत रोक्ने तथा लागुऔषध ओसारपसार, मानव बेचबिखन, नक्कली मुद्रा कारोबार, हातहतियार र अवैध नगद तस्करी नियन्त्रणमा कडाइ गर्ने सहमति समेत गरेको छ।
