काठमाडौं: एयर अरेबियाको जहाज त्रिभुवन अन्तर्राष्ट्रिय विमानस्थलमा अवतरण गर्न लाग्दा ‘मिस एप्रोच ओभरसुट’ भएको छ। आज दिउँसो १:०५ बजे काठमाडौं विमानस्थलमा अवतरण गर्ने क्रममा जहाजले नरेफाँटमाथिबाट एक्कासी ओभरसुट गरेको हो।
विमानस्थलका प्रवक्ता रिञ्जी शेर्पाका अनुसार हावाको गति नमिल्दा ‘विन्ड सियर’ भएको कारणले जहाज मिस एप्रोच गर्न बाध्य भएको थियो। “एप्रोच लिँदा दुई तर्फको हावा असन्तुलित हुँदा भुमरीजस्तो हुनेलाई ‘विन्ड सियर’ भनिन्छ, जसका कारण जहाज हल्लिएर अवतरण सम्भव भएन,” शेर्पाले जानकारी दिए।
त्यस्तै, नयाँ दिल्लीबाट आएको एयर इण्डियाको जहाज सिमरा क्षेत्रको आकाशमा चार फन्को मारेपछि बल्ल काठमाडौंमा अवतरण गर्न सफल भयो। बैंककबाट आएको थाइ लाइन एयरको जहाज पनि केहीबेर होल्डमा परेको थियो।
यसअघि, जापानको नारिताबाट आएको नेपाल एयरलाइन्सको जहाज, कतार एयरवेज, एयर इन्डिया, बाटिक एयर, र फ्लाई दुबईका जहाजहरू पनि प्रतिकूल मौसमका कारण होल्ड भएका थिए। आन्तरिक उडानमा पनि असर परेको छ। भैरहवाबाट आएको फ्लाइ दुबई, धनगढीबाट आएको बुद्ध एयर, र पोखराबाट आएको यति एयरलाइन्सका विमान न्यून भिजिबिलिटीका कारण होल्डमा परेका थिए।
पछिल्लो एक सातादेखि मौसम खराबीका कारण मुलुकभर हवाई उडान प्रभावित भएको छ। नेपालमा प्रि-मनसुन गतिविधि सक्रिय रहेकाले वर्षा गराउने मौसमी प्रणाली विकसित भइरहेछ, जसले न्यून भिजिबिलिटी र हावाको असन्तुलन सिर्जना गरिरहेको छ।
अन्तर्राष्ट्रिय उडानका जहाज काठमाडौं विमानस्थलको पश्चिमतर्फ ‘जिरो टु’ बाट मात्र अवतरण गर्नुपर्ने भएकाले मौसम प्रतिकूल हुँदा समस्या अझै बढी देखिएको छ। आन्तरिक उडानका लागि भने दुवैतर्फबाट अवतरण गर्न मिल्ने भएकाले तुलनात्मक रूपमा कम असर परेको विमानस्थल कार्यालयले जनाएको छ।
बुधबार राति काठमाडौं उपत्यका लगायत देशका विभिन्न स्थानमा हल्कादेखि मध्यम वर्षा भएको थियो। जल तथा मौसम विज्ञान विभागका अनुसार आज पनि कोशी, बागमती, र गण्डकी प्रदेशका पहाडी क्षेत्रमा अपराह्नतिर मेघगर्जन र चट्याङ्गसहित हल्कादेखि मध्यम वर्षाको सम्भावना रहेको छ।
