लेखनाथ (कास्की): पोखरा महानगरपालिकाका प्रमुख धनराज आचार्यले पोखरा अन्तरराष्ट्रिय विमानस्थलबाट सुरु भएको चीनको सिचुवान प्रान्तस्थित छेन्दु सहरको सिधा उडानलाई निरन्तरता दिन सबैको साथ र सहकार्य अपरिहार्य रहेको बताउनुभएको छ।
सोमबार पोखरामा पोखरा पर्यटन परिषद्ले आयोजना गरेको कार्यक्रममा उहाँले छेन्दुमा गरिएको पहिलो व्यावसायिक चाटर्ड उडानका सहभागीहरूलाई प्रमाणपत्र प्रदान गर्दै उक्त उडानले पोखराबाट अन्तरराष्ट्रिय उडानको सम्भावनालाई उजागर गरेको धारणा राख्नुभयो।
उहाँले भन्नुभयो, “छेन्दु, लुझाउ, छोङ्छिङ लगायत सहरमा सम्पन्न कार्यक्रमहरूले नेपाल र चीनबीचको सम्बन्ध सुदृढ मात्र नभई पर्यटकीय साझेदारीलाई पनि नयाँ उचाइमा पु-याएको छ। सिचुवान एयरलाइन्सको अन्तर्राष्ट्रिय सञ्जालको भरपूर उपयोग गर्न आवश्यक छ।”
महानगर प्रमुख आचार्यले चीनको आली विमानस्थलमा पोखराबाट सिधा उडान गर्न सकिने सम्भावना उल्लेख गर्दै यसले पोखराको आर्थिक विकासमा उल्लेखनीय टेवा पुर्याउने विश्वास व्यक्त गर्नुभयो।
नेपाल पर्यटन बोर्ड गण्डकी प्रदेश प्रमुख मणिराज लामिछानेले उडानको अवसरमा छेन्दु र छोङ्छिङमा आयोजना गरिएको बी–टू–बी तथा सेल्स मिसन कार्यक्रमले नेपाली पर्यटन प्रवर्द्धनमा सकारात्मक प्रभाव पार्ने विश्वास व्यक्त गर्नुभयो।
पोखरा पर्यटन परिषद्का अध्यक्ष तारानाथ पहारीले पहिलो सफल उडानले पोखरा–चीन सम्बन्धलाई थप सुदृढ बनाएको उल्लेख गर्दै आगामी दिनमा उडान निरन्तरताका लागि सबै सरोकारवाला निकायको एकताबद्ध प्रयास आवश्यक रहेकोमा जोड दिनुभयो।
परिषद्का महासचिव तथा कार्यक्रम संयोजक जीवनराज सापकोटाले उडान सफल बनाउन सहयोग गर्ने सबैलाई धन्यवाद दिँदै कार्यक्रममार्फत चीनका विभिन्न सहरहरूसँग पोखराको सम्बन्ध अझ प्रगाढ बनेको धारणा राख्नुभयो।
कार्यक्रममा परिषद्का संस्थापक अध्यक्ष अशोक पालिखे, रामकली खड्का, दीपक पहारीलगायत वक्ताहरूले चीनको अनुशासन, विकास, सरसफाइ आदि पक्षहरू अनुकरणीय रहेको भन्दै त्यसबाट सिक्नुपर्ने आवश्यकता औंल्याउनुभयो।
