काठमाडौं: भारतको जम्मू कश्मीरस्थित पहलगाममा भएको आतंकवादी हमलापछि भारत र पाकिस्तानबीचको तनाव चुलिँदै गएको छ। यस्तो संवेदनशील समयमा संयुक्त राज्य अमेरिकाले कूटनीतिक पहल सुरु गरेको छ।
अमेरिकी विदेशमन्त्री मार्को रुबियोले भारतीय विदेशमन्त्री डा. एस. जयशंकर र पाकिस्तानका प्रधानमन्त्री शाहबाज शरीफसँग छुट्टाछुट्टै टेलिफोन वार्ता गरेका छन्।
अमेरिकी विदेश मन्त्रालयकी प्रवक्ता ट्यामी ब्रुसका अनुसार, रुबियोले डा. जयशंकरसँगको संवादमा पहलगाम हमलाप्रति गहिरो समवेदना प्रकट गर्दै पीडित परिवारप्रति श्रद्धाञ्जली अर्पण गरे। उनले आतंकवादविरुद्धको विश्वव्यापी संघर्षमा भारतप्रतिको अमेरिकाको दृढ समर्थन पुनः पुष्टि गरे। साथै, भारत र पाकिस्तान दुवैलाई दक्षिण एशियामा शान्ति र स्थायित्व कायम गर्न संवाद र संयमता अपनाउन अमेरिकाले आग्रह गरेको बताइयो।
अर्कोतर्फ, रुबियोले पाकिस्तानका प्रधानमन्त्री शाहबाज शरीफसँग क्षेत्रीय परिस्थितिबारे छलफल गरे। पाकिस्तानी प्रधानमन्त्रीको कार्यालयबाट जारी प्रेस विज्ञप्तिमा भनिएको छ कि शरीफले अमेरिकी विदेशमन्त्रीलाई पाकिस्तानको धारणा प्रस्ट पारे।
वार्तामा शाहबाज शरीफले भारतमाथि उत्तेजना फैलाएको आरोप लगाउँदै भने, “भारतका उत्तेजक गतिविधिले पाकिस्तानको आतंकवादविरुद्धको जारी प्रयासलाई प्रभावित पार्न सक्छ।” उनले पाकिस्तानलाई पहलगाम आक्रमणसँग जोड्ने भारतको प्रयास अस्वीकार गर्दै घटनाको निष्पक्ष छानबिनको माग दोहोर्याए।
शरीफले अमेरिकालाई भारतलाई ‘उत्तेजक अभिव्यक्तिबाट टाढा राख्न’ सुझाव दिन आग्रह गरे, किनभने यस्तो अभिव्यक्तिले दुई मुलुकबीचको तनाव झनै बढ्न सक्ने खतरा रहेको उनले बताए।
