काठमाडौँ । मौसम पूर्वानुमान महाशाखाका अनुसार हाल नेपालमा पश्चिमी वायुको आंशिक प्रभाव रहेको छ ।
यसको प्रभावका कारण कर्णाली प्रदेश र सुदूरपश्चिम प्रदेशको हिमाली भूभागमा सामान्यतया बादल लागेको छ भने पहाडी भूभागमा आंशिक बदली देखिएको छ । बाँकी हिमाली तथा पहाडी भूभागमा मौसम मुख्यतया सफा रहेको महाशाखाले जनाएको
छ ।
आज दिउँसो कर्णाली प्रदेश र सुदूरपश्चिम प्रदेशमा सामान्य बदली रहने तथा बाँकी प्रदेशका पहाडी भूभागमा आंशिक बदली रहने पूर्वानुमान गरिएको छ । सुदूरपश्चिम प्रदेशका केही स्थान र कर्णाली प्रदेशका थोरै स्थानमा मेघगर्जन र चट्याङसहित मध्यम वर्षाको सम्भावना रहेको महाशाखाले जनाएको छ ।
त्यसैगरी, कर्णाली प्रदेश र सुदूरपश्चिम प्रदेशका उच्च पहाडी तथा हिमाली भूभागका केही स्थानमा हल्का हिमपातको सम्भावना पनि रहेको छ ।
आज राति तराईका केही स्थानमा हुस्सु लाग्ने अनुमान गरिएको छ । साथै, कोशी, गण्डकी, कर्णाली र सुदूरपश्चिम प्रदेशका उच्च पहाडी तथा हिमाली भूभागमा आंशिक बदली रहनेछ भने बाँकी भूभागमा मौसम मुख्यतया सफा रहने महाशाखाले जानकारी दिएको छ ।
