काठमाडौँ: नेकपा (माओवादी केन्द्र)का उपाध्यक्ष अग्निप्रसाद सापकोटाले आगजनीमा परी ज्यान गुमाएका पत्रकार सुरेश रजकको परिवारलाई न्याय दिन माओवादी केन्द्रले सरकारलाई निरन्तर दबाब दिइरहेको बताएका छन्।
बिहीबार ताहाचलस्थित रजकको निवासमा पुगेर सापकोटाले घटनाको सत्यतथ्य छानबिन र दोषीमाथि कडा कारबाहीका लागि पार्टीले पटकपटक सरकारको ध्यानाकर्षण गराएको जानकारी दिए।
“पीडित परिवारको पक्षमा हाम्रो पार्टी दृढतापूर्वक उभिएको छ,” सापकोटाले भने, “परिवारले उठाएका मागहरूमा हाम्रो समर्थन छ।”
रजकका परिवारले घटनाको निष्पक्ष छानबिन, दोषीलाई कडा कारबाही, सुरेशलाई सहिद घोषणा गर्न तथा तीनकुनेमा उनको सालिक निर्माण गर्न सरकारसँग माग गरेका छन्।
गत चैत १५ गते विवादित मेडिकल व्यवसायी दुर्गा प्रसाई नेतृत्वको पूर्वराजा ज्ञानेन्द्र शाह समर्थक भीडले तीनकुनेस्थित एक निजी घरमा गरेको तोडफोड र आगजनीको क्रममा प्रदर्शनको दृश्य खिचिरहेका पत्रकार सुरेश रजकको ज्यान गएको थियो।
