काठमाडौं: नेपाल पञ्चाङ्ग निर्णायक विकास समितिले पात्रो तथा भित्तेपात्रो प्रकाशन गर्नुअघि अनिवार्य रूपमा स्वीकृति लिन आग्रह गरेको छ।
संस्कृति, पर्यटन तथा नागरिक उड्डयन मन्त्रालयअन्तर्गत रहेको समितिका कार्यकारी निर्देशक सूर्यप्रसाद ढुङ्गेलका अनुसार मन्त्रिपरिषद्को २०७७ पुस २० गतेको निर्णयअनुसार समितिको स्वीकृति लिएपछि मात्रै पात्रो तथा भित्तेपात्रो प्रकाशन गर्नुपर्ने व्यवस्था छ।
समितिले स्वीकृति नलिइ प्रकाशित हुने पात्रोमा चाडपर्व, बिदा तथा अन्य महत्वपूर्ण विवरणहरूमा त्रुटि आउन सक्ने भएकाले त्यसो नगर्न अनुरोध गरेको छ। साथै, यस्ता अनधिकृत पात्रो बजारमा नआओस् भन्नका लागि अनुगमनलाई समेत कडा पारिएको छ।
समितिको स्वीकृति बिना प्रकाशित भएका पात्रो तथा भित्तेपात्रो बजार अनुगमनका क्रममा फेला परेमा जफत गरिने र प्रकाशकलाई कानुनी कारबाही गरिने समितिले चेतावनी दिएको छ।
यस विषयमा थप जानकारी आवश्यक परे नारायणहिटीस्थित समितिको कार्यालयमा सम्पर्क गर्न सकिने ढुङ्गेलले जानकारी दिएका छन्।
