काठमाडौं: प्रतिकूल मौसमका कारण भिजिबिलिटी कमजोर हुँदा आन्तरिक तथा अन्तर्राष्ट्रिय हवाई उडान प्रभावित भएका छन्।
त्रिभुवन अन्तर्राष्ट्रिय विमानस्थलका महाप्रबन्धक जगन्नाथ निरौलाका अनुसार मौसम बिग्रिएका कारण केही विमानहरू आकाशमै ‘होल्ड’ हुनुपरेको छ। विमानस्थल कार्यालयका अनुसार जापानको नारिताबाट आएको नेपाल एयरलाइन्सको विमान पनि केही समय होल्ड भएपछि मात्र अवतरण भएको थियो।
कम भिजिबिलिटीका कारण कतारको दोहाबाट आएको कतार एयरवेज, भारतको नयाँ दिल्लीबाट आएको एयर इन्डिया, मलेसियाको क्वालालम्पुरबाट आएको बाटिक एयर, दुबईबाट आएको फ्लाइ दुबई, भैरहवाबाट आएको फ्लाइ दुबई, धनगढीबाट आएको बुद्ध एयर र पोखराबाट आएको यति एयरलाइन्सका विमानहरू प्रभावित भएका छन्।
