काठमाडौँ: अखिल नेपाल फुटबल सङ्घ (एन्फा) का अध्यक्ष पङ्कजविक्रम नेम्वाङ्गले चलचित्र ‘अञ्जिला’मा देखाइएको संघर्ष हरेक खेलाडीको जीवनीसँग मेल खाने बताएका छन्। मङ्गलवार, ललितपुरको लाविम मलस्थित एक चलचित्र भवनमा नेपाली राष्ट्रिय महिला फुटबल टिमकी कप्तान र गोलरक्षक अञ्जिला तुम्बापो सुब्बाको जीवनमा आधारित चलचित्र ‘अञ्जिला’ हेरेपछि अध्यक्ष नेम्वाङ्गले उक्त चलचित्रले खेलमा भविष्य बनाउने इच्छुकलाई प्रेरणा दिने बताएका छन्।
उहाँले भन्नुभयो, “चलचित्रमा देखाइएको पात्रले हाम्रो सबै खेलाडीको प्रतिनिधित्व गर्छ। कप्तान सुब्बाको जस्तो संघर्ष गरेर धेरै खेलाडीले सफलता प्राप्त गरेका छन्। यहाँ हामीले आफ्नो बच्चा पनि ल्याएका छौँ, किनकि यो चलचित्रले उनीहरूलाई लक्ष्य प्राप्तिका लागि मेहनत गर्न प्रेरणा दिन्छ। यो हरेक खेलाडीले हेर्नु पर्ने चलचित्र हो।”
अध्यक्ष नेम्वाङ्गले खेलाडीका विषयमा चलचित्र बन्नुलाई प्रशंसा गर्दै निर्माता प्रेमकुमार श्रेष्ठ र निर्देशक मिलन चाम्सलाई धन्यवाद दिएका छन्। कप्तान सुब्बाका धर्मपिता पनि रहेका निर्माता प्रेमकुमार श्रेष्ठले चलचित्रको सफलताले भविष्यमा खेलाडीका विषयमा अरू चलचित्र बनाउन अन्य निर्माताहरूसमेतलाई उत्साहित गर्ने बताए।
उहाँले भन्नुभयो, “नेपालमा खेलाडीका विषयमा बनेका चलचित्रहरू व्यावसायिक सफलतामा सफल हुन सकेका छैनन्, जसकारण अन्य निर्माताले लगानी गर्न सकिरहेका थिएनन्। यद्यपि, ‘अञ्जिला’को सफलताले उनीहरूलाई हौसला दिएको छ। मैले कप्तान सुब्बालाई लिएर देखेको सपना अब चाँडै पूरा हुनेछ।”
चलचित्रका निर्देशक मिलन चाम्सले भने, “अब आउने समयमा खेलाडी वा खेलका विषयमा चलचित्र बन्नेछन्। मैले केही चलचित्रको छलफल पनि सुनेको छु। यो खेलप्रेमीका लागि सुखद समाचार हो।”
कार्यक्रममा एन्फाका महासचिव किरण राई, पूर्व कप्तान हरि खड्का, विराज महर्जन, खेलाडी सङ्घका अध्यक्ष विक्रम लामा, महिला फुटबल सङ्घका केन्द्रीय सदस्य पेमा लामा र विना श्रेष्ठ, तथा राष्ट्रिय महिला फुटबल टिमको म्यानेजर विन्द्रा देवानलगायतका विशिष्ट व्यक्तिहरू उपस्थित थिए। नेपालमा यो चलचित्र गत फागुन २९ देखि प्रदर्शनमा आएको हो।
