काठमाडौं । प्रतिनिधिसभा अन्तर्गतको उद्योग, वाणिज्य, श्रम तथा उपभोक्ता हित समितिले नेपाली उद्योगहरूको प्रतिस्पर्धात्मक क्षमता अभिवृद्धि गर्न र विद्यमान कर तथा भन्सार महसुलको पुनरावलोकन गर्न अर्थ मन्त्रालयलाई निर्देशन दिने भएको छ।
समितिका सभापति रहबर अन्सारीले नेपाली उद्योगहरूले लामो समयदेखि आफ्नो प्रतिस्पर्धात्मक क्षमता घट्दै गएको गुनासो गर्दै आएको सन्दर्भमा समितिले यस विषयलाई गम्भीरतापूर्वक लिएको बताए। उनका अनुसार कच्चा पदार्थ आयात गर्दा लाग्ने उच्च कर र भन्सार महसुलका कारण स्वदेशी उत्पादनको लागत बढेर आयातित वस्तुसँग प्रतिस्पर्धा गर्न कठिन भएको छ।
उद्योगीहरूको समस्या समाधानका लागि समितिले उद्योग मन्त्रीको उपस्थितिमा अर्थ मन्त्रालयका राजस्व सचिव, भन्सार विभागका महानिर्देशक, उद्योग सचिव तथा सम्बन्धित उद्योगी प्रतिनिधि र सांसदहरूको सहभागितामा छलफल गरेको छ।
छलफलमा उद्योग क्षेत्रको लागत संरचना, कर नीति र भन्सार प्रणालीलाई पुनरावलोकन गर्नुपर्ने आवश्यकता औँल्याइएको थियो। समितिले यी सुझावलाई आधार बनाएर अर्थ मन्त्रालयलाई आवश्यक सुधारका लागि निर्देशन दिने तयारी गरेको छ।
समितिले उद्योगमैत्री कर प्रणाली, उत्पादन लागत घटाउने नीति र स्वदेशी उद्योगलाई प्रतिस्पर्धी बनाउने वातावरण निर्माण गर्न सरकार गम्भीर हुनुपर्ने निष्कर्ष निकालेको छ।
