काठमाडौं – अन्तरिक्ष यात्राबाट फर्किएपछि नासाका अन्तरिक्ष यात्री सुनिता विलियम्स र बुच विल्मोरले पत्रकार सम्मेलन गरेका छन्।
पत्रकार सम्मेलनमा सुनिता विलियम्सले पृथ्वीमा पुनरागमनको अनुभव साझा गर्दै भनिन्, “हाम्रो शरीरले परिवर्तनसँग कसरी अनुकूलन गर्छ भन्ने कुरा साँच्चै चमत्कार हो। पहिलो दिन फर्किंदा हामी सबै थोरै डगमगाएका थियौं। तर, हाम्रो स्नायु प्रणालीले २४ घण्टाभित्रै पुनः सामान्य रूपमा काम गर्न थाल्यो। यो प्रक्रिया साँच्चै अचम्मको छ, जसमा हाम्रो मस्तिष्कले के भइरहेको छ भनेर चाँडै बुझ्छ।”
भारतीय मूलकी नासाकी अन्तरिक्ष यात्री सुनिता विलियम्स अन्तर्राष्ट्रिय अन्तरिक्ष स्टेशनमा २८६ दिन बिताएपछि मार्च १९ मा पृथ्वीमा फर्किइन्।
अन्तरिक्षमा रहँदा सुनिता विलियम्स र बुच विल्मोरले ९०० घण्टाभन्दा बढी अनुसन्धान गरे। सो अवधिमा उनीहरूले १५० वैज्ञानिक प्रयोगहरू सम्पन्न गरेका थिए, जसले भविष्यका अन्तरिक्ष मिसनहरूका लागि महत्वपूर्ण डाटा उपलब्ध गराउने अपेक्षा गरिएको छ।
